Þetta leiðir rannsókn Wall Street Journal í ljós en samkvæmt henni hafa að minnsta kosti tólf vísindamenn verið handteknir í Rússlandi síðastliðin sex ár vegna gruns um njósnir. Helmingur þeirra hefur verið handtekinn eftir að Rússar réðust inn í Úkraínu árið 2022.
Eru rússnesk stjórnvöld sögð óttast að þessir vísindamenn kunni að hafa deilt mikilvægum og háleynilegum upplýsingum með erlendum kollegum sínum. Þeir sem ferðast hafa á erlendar ráðstefnur eru sagðir vera í sérstaklega mikilli hættu.
Yfirvöld í Kreml eru sögð játa því að handtökurnar hafi átt sér stað en þau hafa verið treg til að veita frekari upplýsingar um þær. BBC, sem greindi frá málinu fyrr á þessu ári, segir að réttarhöld yfir þeim sem grunaðir eru um landráð fari fram fyrir luktum dyrum og því sé erfitt fyrir blaðamenn að nálgast upplýsingar um málin.
Bent er á það í umfjöllun Wall Street Journal að flestir þeirra vísindamanna sem hafa verið handteknir séu reynslumiklir á sínu sviði. Á það til dæmis við um hinn 58 ára gamla Alexander Shiplyuk sem var dæmdur í 15 ára fangelsi í septembermánuði og hinn 78 ára gamla Anatoly Maslov sem var dæmdur í 14 ára fangelsi í maí.
Þá kemur fram að flestir þessara vísindamanna hafi ekki unnið beinlínis að þróun vopna, til dæmis ofurhljóðfrárra eldflauga, heldur gert rannsóknir, oftar en ekki í samstarfi við erlenda vísindamenn, um þróun á tækni sem getur nýst við vopnaframleiðslu.
