Norska ríkisútvarpið NRK greindi frá því fyrr í dag að maður sem naut nafnleyndar þegar hann sótti um yfirmannsstöðu hjá sveitarfélaginu Drammen hefði fengið starfið. Maðurinn hafði gegnt stöðunni tímabundið en hefur nú hlotið fastráðningu. Sérfræðingur gagnrýnir málsmeðferðina og segir hana bera keim af klíkuskap.

Sérfræðingur í lögum um opinberar upplýsingar segir tilgangslaust að leyfa umsækjendum um opinberar stöður að njóta nafnleyndar í Noregi og segir slíkt orðið æ algengara sem sé ekki heillavænleg þróun.

Drammen auglýsti nýlega eftir umsækjendum um stöðu yfirmanns samfélagsmála (n. direktør for samfunn). Alls sóttu 10 karlar og níu konur um stöðuna þar á meðal var kona sem starfaði sem undirmaður mannsins sem þá gegndi stöðunni tímabundið og sótti sjálfur um. Sá heitir Bertil Horvli en hann hafði gegnt stöðunni í eitt og hálft ár án þess þó að vera fastráðinn. Hann óskaði eftir að njóta nafnleyndar í umsóknarferlinu og því var nafn hans ekki birt á opinberum lista yfir umsækjendur.

Horvli hefur áður gegnt ýmsum stöðum hjá sveitarfélaginu.

Hafi verið skaðlegt að gefa nafnið upp

Áðurnefndur sérfæðingur, Gunnar Bodahl-Johansen, segir þetta ekki í samræmi við lög og telur slíka nafnleynd, sérstaklega gagnvart manni í þessari stöðu, skapa vantraust gagnvart yfirvöldum í Drammen.

Hann segir að fólk sem sæki um störf hjá hinu opinbera og óski eftir að njóta nafnleyndar sé óhæft til að gegna opinberum stöðum.

Horvli vildi ekki tjá sig um málið og vísaði á Trude Andresen sem er æðsti embættismaður sveitarfélagsins (n. kommunedirektør) og yfirmaður Horvli síðasta eina og hálfa árið. Hún veitti samþykki sitt fyrir því að Horvli skyldi njóta nafnleyndar og réði hann svo í stöðuna.

Hún segir að rök hans fyrir því að njóta nafnleyndar hafi á endanum vegið þyngra en rök fyrir því að gagnsæis yrði gætt þegar kæmi að hinum opinbera lista yfir umsækjendur. Hún segir að Horvli standi nú í viðkvæmum samningaviðræðum við einkafyrirtæki fyrir hönd Drammen vegna ýmissa verkefna sem varði skipulag og þróun sveitarfélagsins og að birta nafn hans á listanum hefði grafið undan honum og skaðað sveitarfélagið í leiðinni.

Gunnar Bodahl-Johansen segist eiga bágt með að skilja hvernig það hefði átt að skaða sveitarfélagið að birta nafn Horvli með öðrum umsækjendum um stöðuna. Framganga sveitarfélagsins í málinu geti gefið til kynna að um klíkuskap hafi verið að ræða.