DV fjallaði um málið í gær en þá hafði spurst út að lögreglan hefði handtekið mann sem væri grunaður um að vera The Golden State Killer og East Area Rapist en það er einn og sami maðurinn að sögn lögreglunnar.
Nágrannar DeAngelo segja að hann hafi verið svolítið sérkennilegur en góður nágranni sem hafi alltaf hugsað vel um húsið sitt og garðinn.
„Hann líktist góðum, gömlum afa.“
Sagði einn nágranninn í gær.
En lögreglan er sannfærð um að bak við rennislétt yfirborðið leynist einn af afkastamestu raðmorðingjum og nauðgurum síðari tíma í Bandaríkjunum.
Lögreglan er þess fullviss að DeAngelo sé The Golden State Killer en hann er talinn hafa minnst 12 morð og 51 nauðgun á samviskunni.
„Við vissum alltaf að við værum að leita að nál í heystakk en við vissum líka allan tímann að nálin væri þarna. Við fundum nálina í heystakknum og hún var hér í Sacramento.“
Sagði Anne Marie Schubert, saksóknari, á fréttamannafundinum í gær.
Morðin og nauðganirnar áttu sér stað á tíu ára tímabili á áttunda og níunda áratugnum.
Þrátt fyrir að lögreglunni hafi borist mörg þúsund ábendingar í gegnum tíðina beindust sjónir hennar aldrei að DeAngelo. Hann náði að fela slóð sína vel en nú var það DNA-tæknin sem varð honum að falli.
Lögreglan vildi ekki upplýsa af hverju sjónir hennar hefðu beinst að DeAngelo en sagði að fyrir sex dögum hefði nafn hans komið upp í rannsókninni. Lögreglan fylgdist með honum og fékk DNA úr honum sem var rannsakað. Það passaði við DNA sem fannst á fórnarlömbunum á sínum tíma.
Það var 1976 sem The Golden State Killer lét fyrst á sér kræla en þá nauðgaði hann konu. Næstu árin var hann virkur í norðurhluta Kaliforníu en var ekki enn farinn að myrða fólk. Aðferðir hans voru yfirleitt svipaðar, grímuklæddur og vopnaður fór hann inn um glugga á húsum og réðst á fórnarlömbin, sem voru á aldrinum 13 til 41 árs, sem voru þá í fastasvefni.
Ef um hjón var að ræða hafði hann sérstaka aðferð. Hann batt þá eiginmanninn og staflaði diskum á bak hans. hann hótaði síðan að drepa hjónin ef hann heyrði diskana detta á gólfið á meðan hann nauðgaði konunni.
Það var síðan 1979 sem hann byrjaði að myrða fólk. Fyrstu fórnarlömbin voru Robert Offerman og Debra Mannin sem hann myrti í Goleta. Á næstu 10 árum myrti hann 10 manns til viðbótar.
1986, 10 árum eftir fyrstu nauðgunina, hætti hann skyndilega og hvarf af sjónarsviðinu en af hverju er ekki vitað. Á fréttamannafundinum í gær sagði Scott Jones, lögreglustjóri, að ekkert benti til að hann hafi brotið af sér eftir 1986.
Saksóknarar segja að þeir muni krefjast dauðarefsingar yfir DeAngelo.
