Maður er ákærður fyrir nauðgun, frelsissviptingu og sérstaklega hættulega líkamsárás gagnvart konu. Atvik málsins urðu frá laugardegi til sunnudags einhvern tíma á árinu 2023, í íbúð í Hafnarfirði. Þar er maðurinn sagður hafa frelsissvipt konuna í nokkrar klukkustundir og án samþykkis haft við hana samræði og önnur kynferðismök.
Í ákæru segir að konan hafi ýtt manninum af sér og reynt að komast undan honum en hann hafi þá hrint henni fram af stigapalli þannig að hún lenti á gólfinu á neðri hæð hússins. Þar er hann sagður hafa sparkað og slegið í líkama konunnar nokkrum sinnum, rifið í hár hennar og dregið hana upp á efri hæð íbúðarinnar og haldið henni þar gegn vilja hennar uns hún sofnaði. Konan hlaut nokkra áverka af árásinni, eymsli yfir efri hluta augntóftar og út á kjálkaboga, kúlu á vinstra gagnauga, eymsli aftanvert á brjóstkassa beggja vegna, hruflsár undir hægra herðablaði og mar þar fyrir ofan, mar frá hægri öxl, niður á hægri upphandlegg og hægri olnboga og mar á vinstri öxl og á neðri helming vinstri framhandleggs.
Misþyrmdi annarri konu
Maðurinn er ákærður fyrir annað ofbeldisbrot gegn annarri konu á ódagsettum sunnudegi árið 2024, einnig í íbúð í Hafnarfirði. Hann er þar sagður hafa slegið konuna í tvö skipti í höfuðið með glerflösku, sparkað í nokkur skipti í líkama hennar og höfuð og nokkrum sinnum slegið hana með krepptum hnefa í höfuðið. Konan hlaut sár á vinstri augabrún og bólgu þar undir og eymsli yfir rifjabarði hægra megin.
Maðurinn er einnig ákærður fyrir fíkniefnalagabrot og vopnalagabrot, fyrir að hafa haft fíkniefni og stunguvopn í fórum sínum.
Fyrir hönd fyrrnefndu konunnar er gerð krafa um miskabætur frá ákærða að fjárhæð 15 milljónir króna.
Aðalmeðferð í málinu verður fyrir Héraðsdóm Reykjavíkur þann 12. október næstkomandi.
