Frá því að sitjandi ríkisstjórn tók við völdum og fram til 30. apríl síðastliðins hefur starfsfólk utanríkisþjónustunnar, þar með talið aðstoðarmenn ráðherra, farið í alls 835 utanlandsferðir. Það jafngildir eilitíð undir tveimur ferðum að meðaltali á dag eða 1,68.
Þetta kemur fram í svari Þorgerðar Katrínar Gunnarsdóttur utanríkisráðherra við fyrirspurn Nönnu Margrétar Gunnlaugsdóttur þingmanns Miðflokksins.
Nanna spurði hversu margar utanlandsferðir hafi verið farnar á vegum utanríkisþjónustunnar, þar á meðal af pólitískt ráðnum starfsmönnum, frá því að ríkisstjórnin tók við völdum. Óskaði hún eftir að í svarinu kæmi fram dagsetning ferðar, áfangastaður, fjöldi einstaklinga í hverri ferð, erindi ferðar og lengd hennar.
Í svari Þorgerðar segir að öflug hagsmunagæsla starfsfólks utanríkisþjónustunnar kalli á reglulegt samráð og ræktun náinna tengsla við önnur ríki, jafnt tvíhliða sem á vettvangi alþjóðastofnana. Utanríkisþjónustan sinni hagsmunagæslu á sviði utanríkis- og varnarmála, utanríkisviðskipta og þróunarmála, sem falli oft hvert undir sitt ráðuneyti hjá öðrum ríkjum. Þróun heimsmála hafi síður en svo dregið úr mikilvægi virkrar þátttöku í alþjóðasamstarfi. Þótt fjarfundarbúnaður sé mikið notaður í starfi utanríkisþjónustunnar komi hann ekki alltaf í stað funda í eigin persónu þar sem öryggi upplýsinga og traust séu lykilatriði.
Um 900
Á tímabilinu frá 21. desember 2024 til 30. apríl 2026 hafi verið farnar 835 ferðir á vegum utanríkisþjónustunnar til 67 mismunandi ríkja. Flestar þessara ferða, eða 683, hafi verið til Evrópulanda, ýmist vegna tvíhliða samskipta við Evrópuríki eða fjölþjóðlegs samstarfs á vettvangi alþjóðastofnana sem þar séu staðsettar.
Þar af hafi 239 ferðir verið til einhvers Norðurlandanna: Grænlands, Færeyja, Noregs, Danmerkur, Svíþjóðar, Álandseyja og Finnlands.
Á tímabilinu hafi verið farnar 75 ferðir til Bandaríkjanna og Kanada, og 44 ferðir til Asíu. Þá hafi verið farnar 28 ferðir til Afríku, einkum vegna þróunarsamvinnuverkefna, sem og 5 ferðir til Rómönsku Ameríku og Karíbahafsins.
Segir enn fremur í svari ráðherrans að í 723 tilvikum af þessum 835 (87 prósent) hafi viðkomandi starfsmenn utanríkisþjónustunnar ferðast einir síns liðs en í 78 tilvikum (9 prósent) hafi tveir starfsmenn ferðast saman. Í 34 tilvikum (4 prósent) ferðuðust fleiri en tveir saman.
Tæplega tveir þriðju hlutar ferðanna hafi staðið yfir í fjóra daga eða skemur og meðallengd ferða verið 4,9 dagar.
Aðstoðarmenn utanríkisráðherra fóru í samtals 33 af þessum 835 ferðum á tímabilinu.
Segir í svarinu að lokum að ekki séu taldar með ferðir starfsfólks á milli starfsstöðva vegna, eða í tengslum við, flutninga eða afleysingar. Þá séu ekki taldar með ferðir innan umdæma sendiráða Íslands erlendis.
