Úrskurðarnefnd umhverfis- og auðlindamála hefur vísað frá kröfum, m.a. frá Siglingasambandi Íslands, um að banni við siglingum á seglbrettum og sjódrekum á Seltjörn, á tilteknum árstíma, verði aflétt. Bannið er hluti af friðlýsingu Seltjarnar og Gróttu en kærendur segja þetta of langt gengið.
Kærur sem bárust til nefndarinnar vegna bannsins voru tvær. Annars vegar frá ónefndum einstaklingi sem kærði þá grein friðlýsingar Seltjarnar og Gróttu sem kveður á um að umferð hraðra vatnatækja svo sem sjódreka og seglbretta innan Seltjarnar sé bönnuð á tímabilinu 1. maí–31. júlí. Það var umhverfis-, orku-, og loftslagsráðherra sem tók ákvörðun um friðlýsinguna sem birt var í Stjórnartíðindum þann 15. júlí síðastliðinn.
Umræddur einstaklingur gerði ekki athugasemd við að sjókettir lytum sérstökum reglum samkvæmt ákvæðinu en krafðist þess að öðru leyti að bann við siglingum, í friðlýsingunni, yrði úrskurðað ólögmætt.
Siglingasamband Íslands sendi einnig inn kæru og krafðist þess sömuleiðis að þetta ákvæði í kærunni yrði fellt úr gildi að því leyti sem það tæki til seglbretta og sjódreka. Til vara var þess krafist að ákvæðið yrði fellt úr gildi og málinu vísað til nýrrar meðferðar. Til þrautarvara krafðist sambandið þess að gildissvið og tímalengd bannsins yrði takmarkað þannig að það næði aðeins til þeirra svæða og þess tíma sem nauðsynlegt væri vegna fuglavarps og verndunar lífríkis.
Of langt
Í kærum Siglingasambandsins og hins ónefnda einstaklings voru færð rök fyrir því að bannið gengi lengra en nauðsynlegt væri til að ná markmiðum friðlýsingarinnar. Það byggði á óskýrri og matskenndri skilgreiningu á því hvað teldust vera hröð vatnatæki og fæli í sér að mjög ólík tæki væru felld undir sama flokk, en seglbretti og sjódrekar væru ólík sjóköttum þegar kæmi að aflgjafa, hávaðamengun, útblæstri, stjórnhæfni og mögulegum áhrifum á lífríki. Bannið styddist ekki við fullnægjandi rannsóknir á áhrifum seglbretta og sjódreka. Það gerði ófullnægjandi greinarmun á mismunandi tegundum umferðar og skerti með verulegum hætti útivistarmöguleika siglingafólks.
Í niðurstöðu úrskurðarnefndar umhverfis- og auðlindamála segir að ákvarðanir um friðlýsingu séu teknar af umhverfis-, orku- og loftslagsráðherra en Náttúruverndarstofnun annist undirbúning ákvörðunarinnar. Hægt sé samkvæmt lögum að kæra ákvarðanir Náttúruverndarstofnunar til úrskurðarnefndarinnar, en aðrar ákvarðanir sem lúti að framkvæmd laga um náttúruvernd og ráðherra taki ekki sjálfur eða staðfesti sæti kæru til ráðherra. Þar af leiðandi sé ekki lagaheimild fyrir því að kæra friðlýsinguna til nefndarinnar.
Kærum Siglingasambandsins og hins ónefnda einstaklings var því vísað frá.
