Fáir strokuminkar fundust í Mosfellsdal um helgina en búið er að setja upp gildrur víða um dalinn eftir að skemmdarvargar slepptu út um tíu þúsund minkum úr Dalsbúi á miðvikudag í síðustu viku. Ásgeir Pétursson loðdýrabóndi á Dalsbúi sagði í kvöldfréttum RÚV í gærkvöldi að hann giski að tjónið sé upp á 30 til 40 milljónir króna.
Atli Sævar Guðmundsson, stjórnarmaður í Samtökum um dýravelferð á Íslandi, segir í grein á Vísi í dag að það er eins og samfélagið hafi rankað við sér og áttað sig á áhættunni þegar minkunum var sleppt.
„Fyrst var reyndar mikið talað um glæpamennina sem brutust inn og slepptu dýrunum út – eðlilega því það var algjörlega glórulaust og ábyrgðarlaust. En eftir að rykið settist byrjaði fólk að spyrja sig: Er virkilega réttlætanlegt að leyfa slík minkabú?“
Hann segir jákvætt að Norðurþing hafi bannað loðdýrarækt og það sé einnig til umræðu hjá Reykjavíkurborg.:
„Þetta eru auðvitað frábærar fréttir fyrir okkur sem nútímasamfélag þar sem dýravelferð og umhverfisvernd eru að verða mikilvægari eftir því sem vitund okkar vex. Loðdýrarækt er á leiðinni út og samkennd og samvitund á leiðinni inn. Allt á réttri leið.“
Atli segir að mannfólk sé enn ágengara á nátturuna en minkar:
„Minkaslysið mun hafa slæm áhrif á umhverfið. Það mun valda fuglalífi og öðrum dýrategundum skaða ef minkarnir ná fótfestu og dreifingu. En það er önnur tegund sem er enn ágengari fyrir náttúruna en minkurinn. Það er mannfólk,“ segir hann.
„Ég læt vera að þylja upp allt það sem maðurinn hefur gert til að hafa neikvæð áhrif á náttúruna síðustu áratugi en nefni þó í þessu samhengi að villt spendýr eru nú aðeins um 5% af samanlögðum lífmassa spendýra á jörðinni. Menn eru um 36% og búfé um 59%. Einnig hafa stofnstærðir dýrategunda fallið gríðarlega hratt síðustu 50 ár. Samkvæmt Living Planet Index hefur meðalstærð vaktaðra stofna villtra hryggdýra minnkað um 73% frá 1970 til 2020.“
Hann segir að atvikið í síðustu viku veita innsýn í hjörtu landsmanna:
„Okkur er alls ekki sama. Við höfum einlægan vilja til að vernda villtar dýrategundir og vistkerfið sem þær tilheyra,“ segir Atli.
„Það finnst mér fallegt. Á bak við deilur um Evrópusambandið og skítkast í kommentakerfum er kærleiksrík þjóð sem reiðist heiftarlega þegar villtu dýralífi er ógnað. Það yljar mér um hjartarætur.“
