„Ég hef verið mjög efins um að það sé góð hugmynd að efna til atkvæðagreiðslu um ESB á þessum tíma glundroða í veröldinni og heiftarlegrar pólaríseringar þar sem pólitísk umræða er eiginlega orðin að tómu rugli og illindum,“ segir fjölmiðlamaðurinn Egill Helgason í færslu á Facebook.
Vísar hann í frétt mbl um umræður á fundi Áfram Ísland á Selfossi nýverið þar sem Bjarni Harðarson, bókaútgefandi og fyrrverandi þingmaður Framsóknarflokksins, velti upp hvort fasísk öfl nái yfirhöndinni í Evrópusambandinu.
„Og jú - umræðan tekur á sig ýmsar undarlegar myndir. Þeir sem eru utanlega til hægri segja að ESB sé hálfgerður kommúnismi, þeir sem eru utarlega til vinstri segja að það sé samsæri auðvaldsaflanna - og hér er því svo haldið fram að ESB sé að þróast áttina til fasisma. Vituð þér enn - eða hvað?“
Jón Ferdínand Estherarson, formaður Sósíalistaflokksins, er einmitt á þeirri línu þó hann vilji ekki tala um fasisma:
„Evrópuþing hefur aldrei verið skipað stærri hluta öfga hægris (yfir fjórðung), ESB er að vígvæðast, bæði ríkin sjálf og mikið reifað í forystunni um stofnun Evrópuhers, gengið er allharkalega gegn rétti til mótmæla og frjálsrar tjáningar og nýverið samþykkt öfgafyllsta flóttamannalöggjöf í sögu sambandsins (fangabúðir flóttafólks í þriðju ríkjum). Svo ekki sé minnst á eflingu eftirlitsríkisins og sniðgöngu þingmeirihluta í þessu Chat Control máli þar sem tæknirisarnir og yfirvöld fá að sniðganga persónuverndarrétt borgara.“
Egill svarar honum einfaldlega með latnesku skammstöfuninni um að dæmið sé fullsannað.
Elliði Vignisson, bæjarstjóri í Ölfusi, segir tímasetninguna fráleita: „Algerlega fráleidd tímasetning. Segjum NEI í ágúst, og sjáum til seinna.“
Þorsteinn Pálsson, fyrrum forsætisráðherra, segir að efasemdir Egils séu skiljanlegar:
„Þær eru réttmætt íhugunarefni. En frá mínum bæjardyrum horft er það einmitt glundroðinn og þá alveg sérstaklega óvissan sem fylgir tollastríði Bandaríkjanna sem kallar á að við tryggjum kjölfestu okkar betur. Við hefðum jafnvel átt að bregðast við fyrr.“
