Þorgerður Katrín Gunnarsdóttir utanríkisráðherra telur að Ísland geti fengið varanlegar undanþágur frá Evrópusambandinu um eignarhald á sjávarauðlindum. „Við eigum að láta á það reyna. Það er ekkert öruggt í þessu, ekki heldur það sem nei-hópurinn segir að um engar undanþágur sé að fá,“ sagði Þorgerður Katrín í Bítinu á Bylgjunni í morgun og vísaði hún meðal annars til orða sjávarútvegsstjóra ESB sem sagði að það yrði að horfa til sérstöðu Íslands í sjávarútvegi.
Yrði að lúta sameiginlegri sjávarútvegsstefnu
Í gær fjallaði Morgunblaðið um sérstaka umræðu á hollenska þinginu þar sem Rob Jetten forsætisráðherra Hollands var spurður út í möguleika á því að Ísland fengi undanþágur á sviði sjávarútvegs í aðildarviðræðum, sagði hann að ríki sem ganga í Evrópusambandið verði að lúta hinni sameiginlegu sjávarútvegsstefnu þess.
Þá sagði Heiðrún Lind Marteinsdóttir, framkvæmdastjóri Samtaka fyrirtækja í sjávarútvegi, við fréttastofu Sýnar að innganga Íslands í Evrópusambandið sé svo gott sem úr myndinni. „Ef það á að líða það að ein þjóð fái undanþágu þá munu aðrar þjóðir fylgja í kjölfarið. Út frá þeim reglum sem gilda innan ESB þá myndi ég telja að það væri því sem næst útilokað og þá er jafnvel betur heima setið en af stað farið,“ sagði hún.
„Þetta eru samningaviðræður“
Þorgerður Katrín sagði að ef þjóðin myndi segja já í þjóðaratkvæðagreiðslunni 29. ágúst þá yrði byrjað á erfiðustu köflunum í samningaviðræðunum, það er snýr að sjávarútvegi og landbúnaði.
„Okkar samningsmarkmið verða sjávarútvegsmálin, það kemur fram í frábæru nefndaráliti frá þinginu, meirihluta utanríkismálanefndar, að við ætlum að hafa yfirráð yfir fiskveiðistjórninni, yfir fiskveiðiauðlindinni.“
Var hún spurð hvort það væri 100% öruggt að Ísland fái varanlegar undanþágur þegar kemur að sjávarútvegi.
„Ég tel öruggt að það verði tekið tillit til okkar sjónarmiða. Hversu langt og hversu mikið, ég get ekki sagt,“ sagði Þorgerður Katrín. „Þetta eru samningaviðræður.“
Hún hafi talað við fjölda fólks, bæði framkvæmdastjóra hjá Evrópusambandinu og ráðamenn í minni ríkjum sambandsins. „Sem segja: Ekki bara styrktum við fullveldi okkar heldur var tekið tillit til ýmissa þátta hjá okkur. Mér finnst núna þegar við Íslendingar eigum að vera með kassann út, eigum að vera hugrökk á þessum tímum sem eru núna, þá er staða okkar sterk og á ég að vera miskunnarlaus að nýta mér hana? Já, ég ætla bara að nýta mér þessa sterku samningsstöðu sem að við Íslendingar erum í. Hún er allt önnur en þegar við fórum á hnjánum eftir hrunið,“ sagði Þorgerður Katrín.
„Við eigum að láta á þetta reyna og ég er sannfærð um það að við munum sjá fram á undanþágur í fiskveiðimálum og líka í landbúnaðarmálum og líka í loftslagsmálum.“
Hún furðar sig á því fólk sé mikið á móti því að fara í samningaviðræður við ESB: „Ég er alltaf að velta fyrir mér hvers vegna mínir góðu vinir í nei-inu svona ofboðslega fullvissir um það að það sé ekki um neitt að semja – þeir sem spila póker – af hverju draga þeir ekki fram spilin á hendinni? Af hverju segja þeir ekki bara já núna og svo sjáum við hvort þessi kelling þarna, sem heitir Þorgerður, hafi rétt fyrir sér eða ekki.“
