Pawel Bartoszek, þingmaður Viðreisnar, segir hagsmunaaðila í sjávarútvegi hafa eytt síðasta sumri um að reyna að sannfæra fólk um að hærri veiðigjöld myndu ganga af greininni dauðri. Það rættist ekki en nú sé búið að ræsa út sömu vélar, það er fjölmiðla og stjórnmálaflokka í þeirra eigu.
„Allt seinasta sumar unnu hagsmunaaðilar í sjávarútvegi að því að sannfæra almenning um það að greinin myndi gott sem deyja ef hún þyrfti að greiða eðlilegt gjald fyrir afnot af auðlindinni,“ segir Pawel í færslu á samfélagsmiðlum. „Til þess voru fjölmiðlar í þeirra eigu notaðir sem og stjórnmálaflokkar þar sem þeir hafa mestu ítökin. Niðurstaðan: lengsta málþóf Íslandssögunnar.“
Bendir hann á að lögin hafi á endanum verið samþykkt og hvað hafi gerst? Stærstu útgerðir landsins skila áfram góðum hagnaði og greiða milljarða í arð til eigenda sinna. Sem sé vel. En hrakspárnar rættust ekki.
Sömu raddir
„Nú er búið að ræsa út sömu vélarnar til að reyna að sannfæra almenning um að það eitt að við förum í viðræður og fáum samning sem þjóðin getur tekið endanlega ákvörðun um, muni kalla fram sömu áhrif og hækkun veiðigjalda átti að gera,“ segir Pawel. „Það er reynt að sannfæra okkur um að engar sérlausnir sé hægt að fá (þrátt fyrir sérlausnir Svía, Finna og Maltverja sem sanna annað). Og svo er reynt að selja okkur það að óvissan ein muni ganga nærri greininni.“
Íslensk heimili búi líka við langvarandi og mikla óvissu. Áratugalangur verðóstöðugleiki geri það að verkum að þau þurfi að velja á milli þess að taka á sig óvissu lánveitenda vegna verðlags í gegnum verðtryggingu eða búa við miklu hærri vexti en fólk á meginlandinu. Það er 8-9 prósent vexti á Íslandi samanborið við 3-4 prósent á evrusvæðinu.
Fólk skoði heimabankann
„Næst þegar fulltrúar hagsmunaaðilanna mæta í viðtöl og kvarta undan væntanlegri „óvissu“ þarf fólk að fara í heimabankann og skoða mánaðarlegar afborganir fasteignalána,“ segir Pawel. „Hvet ykkur til að lesa færslu eftir Gauta B. Eggertsson sem sýndi hvernig Evruvextir gætu lækkað afborganir á nýju 60 mkr. láni um 113 þúsund kr. á mánuði. Þetta er verðið sem hagsmunaaðilarnir eru að segja okkur að við þurfum að borga svo þeir geti búið við öryggi og vissu og við megum ekki einu sinni fá að SKOÐA augljósasta valkostinn.“
