Allt of dýrt, fá góð söfn, matur sem hentar ekki öllum og allt of langt frá helstu ferðamannastöðum. Þetta er á meðal þess sem er nefnt í greiningu spænska miðilsins Numbeo sem gerir Reykjavík að versta áfangastað fyrir Spánverja í gervallri Evrópu.
Borga mikið fyrir lítið
Reykjavík trónir á toppi listans yfir evrópskar borgir sem Spánverjum er ráðlagt að forðast af ýmsum ástæðum, meðal annars vegna verðlags. Reykjavík er ofar en borgir eins og Zurich, Amsterdam, Flórens og París.
„Hún toppar listann án nokkurs vafa,“ segir um Reykjavík í greiningunni. Er þar nefnt að þar sem Ísland sé utan Evrópusambandsins sé ýmislegt sem valdi því að verð sé hærra.
„Samkvæmt Numbeo kostar matur fyrir tvo á miðlungsgóðum veitingastað í Reykjavík 90 til 110 evrur (13 til 16 þúsund krónur), sem er meira en tvöfalt meðaltal Evrópu og gisting fer oft yfir 200 evrur (29 þúsund krónur) nóttin á þriggja stjörnu hótelum,“ segir þar.
Fá góð söfn og langt í ferðamannastaði
Bent er á að keyra þurfi nokkra leið að helstu ferðamannastöðum og til að komast í ýmsar ferðir. Þá bjóði Reykjavík sjálf upp á mjög takmörkuð gæði fyrir ferðamenn sem koma frá suðurhluta Evrópu.
„Það eru fá góð söfn í borginni, matur sem fullnægir ekki bragðlaukum fólks frá Miðjarðarhafslöndum og þó að næturlífið sé líflegt um helgar þá er það svo dýrt að það verður hamlandi,“ segir í greiningu Numbeo. „Íslensk náttúra er ákaflega falleg, en að komast þangað frá Reykjavík felur í sér kostnað sem er nokkur fórn fyrir flestar spænskar fjölskyldur.“
Listinn í heild
Í öðru sæti er Zurich í Sviss, sem líkt og Reykjavík er utan Evrópusambandins. Svissneski frankinn er sterkur gagnvart evru og því finnst Spánverjum þeir greiða of mikið fyrir of lítið.
Í þriðja sæti er Amsterdam, höfuðborg Hollands, sem þjáist af allt of mörgum ferðamönnum. Álagið er mikið sem ýtir upp verði og lengir biðraðir í frægu listasöfnin. Sagt er að borgin hafi breyst mikið á 15 árum og drykkja er víða orðin óhófleg.
Í fjórða sæti er Kaupmannahöfn, höfuðborg Danmerkur, eina aðra Norðurlandaborgin á listanum. Þar eru flestir Michelin staðir að meðaltali en verðið er mjög hátt. Þó Danir séu í Evrópusambandinu nota þeir ekki evru.
Í fimmta sæti eru Feneyjar í Ítalíu. Þar er sérstakur skattur á ferðamenn og verðið á Markúsartorgi og í gondólunum er svimandi. Verðlagið í Feneyjum er um 40 til 60 prósent hærra en í Flórens eða Róm. Þar að auki koma 30 milljón manns til Feneyja á hverju ári þannig að álag er mikið.
Í sjötta sæti er Dubrovnik í Króatíu. „Perla Adríahafsins“ er ein fallegasta borg Evrópu og eftir að stór hluti þáttanna Game of Thrones var tekinn þar upp hefur borgin orðið að pílagrímastað fyrir aðdáendur. En í Dubrovnik búa aðeins um 40 þúsund manns og borgin var ekki tilbúin fyrir álagið. Er hún nú orðin ein dýrasta borg í álfunni og hefur þurft að setja takmarkanir á komur ferðamanna, svo sem komur skemmtiferðaskipa.
Í sjöunda sæti er París, höfuðborg Frakklands. Numbeo bendir á að verðið í París hafi hækkað mikið eftir Ólympíuleikana þar árið 2024. Þá eru oft langar raðir til að komast í listasafnið Louvre, Effel turninn og aðra ferðamannastaði.
Í áttunda sæti er Santorini í Grikklandi. Í raun eyja en ekki borg en í greiningunni er höfuðstaðurinn Fira nefndur. Santorini, sem er ein fallegasta eyja heims, er langtum dýrari áfangastaður en flestir aðrir í Grikklandi. Staður sem er stílaður inn á ríka ferðamenn.
Í níunda sæti er Edinborg, höfuðborg Skotlands. Útganga Bretlands úr Evrópusambandinu hefur gert Edinborg að verri áfangastað en áður og flóknari fyrir spænska ferðamenn. Varað er við því að ferðast til Edinborgar í ágústmánuði þegar verðin rjúka upp í tengslum við Edinborgarhátíðina.
Í tíunda sæti er Flórens í Ítalíu. Hvergi er meira af endurreisnarlist en í Flórens í Toskana héraði. Álagið er hins vegar gríðarlegt og raðirnar langar til að sjá verkin. Miðar eru dýrir og ferðamenn þurfa að panta með löngum fyrirvara.
