Fyrirtæki sem rekur fiskvinnslu í Reykjanesbæ hefur kært þá ákvörðun heilbrigðisnefndar Suðurnesja að leggja á það dagsektir þar til starfseminni verði hætt en fiskvinnslan er í miðju íbúðahverfi. Íbúi í nágrenninu segir að lengi hafi verið kvartað yfir starfseminni og að Heilbrigðiseftirlit Suðurnesja hafi greint nágrönnum fiskvinnslunnar frá því að hún hafi aldrei haft starfsleyfi.
Fiskvinnslan er rekin af fyrirtækinu Premium of Iceland og er við Brekkustíg í Reykjanesbæ en þar er töluvert um íbúðahús en meðal annars er fjölbýlishús hinum meginn við götuna, beint á móti fiskvinnslunni.
Í aðsendri grein á vef Víkurfrétta segir íbúi í nágrenninu að mjög slæm umgengni hafi verið við fiskvinnsluna í mörg ár meðal annars hafi úrgangur frá vinnslunni flætt út á götu. Segir hann að í töluverðan tíma hafi íbúar í nágrenni við fiskvinnsluna kvartað yfir starfseminni við Heilbrigðiseftirlit Suðurnesja og þaðan hafi loks fengist svör sem bendi til að starfsemin hafi verið rekin árum saman án þess að hafa starfsleyfi eða skráningu.
Loka
Ákvörðun heilbrigðisnefndar Suðurnesja, sem fyrirtækið hefur nú kært til úrskurðarnefndar umhverfis- og auðlindamála, og aðdragandi hennar renna raunar stoðum undir að skort hafi á skráningu fyrirtækisins.
Ákvörðunin var tekin í maí síðastliðnum en samkvæmt henni verða 50.000 króna dagsektir lagðr á fyrirtækið þar til starfsemi þess verður stöðvuð. Í kærunni krafðist fyrirtækið þess einnig að dagsektirnar yrðu ekki lagðar á meðan kæran er til meðferðar.
Skrá
Í september 2025 var, með bréfi Heilbrigðiseftirlits Suðurnesja, fyrirtækinu gert að skrá reksturinn þar sem hann félli undir skráningarskyldan rekstur, samkvæmt lögum um hollustuhætti og mengunarvarnir.
Fyrirtækið sótti um skráningu í október en í kjölfar þess tilkynnti heilbrigðiseftirlitið fyrirtækinu um að til stæði að umsókninni yrði hafnað á grundvelli umsagnar skipulagsfulltrúa Reykjanesbæjar þar sem fram kæmi að starfsemi fiskvinnslu á svæðinu samræmdist ekki ákvæðum gildandi aðalskipulags bæjarins. heilbrigðisnefnd Suðurnesja ákvað síðan að hafna umsókninni og í kjölfarið sendi heilbrigðiseftirlitið fyrirtækinu kröfu um að það legði fram áætlun um lokun. Tveir mánuðir liðu án þess að nokkuð gerðist og krafðist eftilitið þess þá að starfseminni yrði hætt án tafar þar sem það hefði ekki samþykkta skráningu til starfseminnar.
Loks var fyrirtækinu tilkynnt að til stæði að leggja á það dagsektir þar til starfsemin yrði stöðvuð. Fyrirtækið andmælti en eins og áður segir samþykkti heilbrigðisnefnd Suðurnesja að dagsektirnar skyldu lagðar á. Lagði fyrirtækið þá fram kæru til úrskurðarnefndar umhverfis- og auðlindamála.
Aðalskipulag
Í kæru fyrirtækisins kom fram að að umsögn skipulagsfulltrúa væri ekki í samræmi við Aðalskipulag Reykjanesbæjar 2020–2035 og að litið hafi verið fram hjá því að í aðalskipulagi væri gert ráð fyrir að settar verði frekari kvaðir um takmarkanir á starfsemi í deiliskipulagi. Úrskurðarnefndin hafi í úrskurði sínum árið 2024 fellt úr gildi sambærilega ákvörðun heilbrigðisnefndar Suðurnesja. Þá væri það hlutverk heilbrigðisnefndar að fara með eftirlit með skráningarskyldum atvinnurekstri og bera ábyrgð á að staðreyna hvort starfsemi uppfyllti skilyrði skráningar. Þeirri ábyrgð yrði ekki útvistað til skipulagsfulltrúa.
Þess ber, í þessu samhengi, að geta að í síðasta mánuði var samþykkt lagafrumvarp á Alþingi sem kveður á um að heilbrigðisnefndir og heilbrigðiseftirlit sveitarfélaga verði lögð niður og að ríkið taki við þeirra hlutverki. Lögin taka gildi um næstu áramót.
Heilbrigðisnefnd Suðurnesja andmælti því ekki að því yrði frestað að leggja dagsektirnar á enda væri um íþyngjandi úrræði að ræða. Lagði nefndin áherslu á að frestunin yrði ekki túlkuð sem heimild fyrir fyrirtækið til að starfrækja skráningarskylda starfsemi án þess að fullnægja lögbundnum skilyrðum. Afstaða heilbrigðisnefndarinnar væri bundin við ákvörðun um álagningu dagsekta og fæli hvorki í sér viðurkenningu á málsástæðum fyrirtækisins né breytta afstöðu til lögmætis hinnar kærðu ákvörðunar.
Úrskurðarnefnd umhverfis- og auðlindamála samþykkti að því yrði frestað að leggja dagsektir á fyrirtækið þar til starfsemin verði stöðvuð. Segir nefndin ljóst að álagning dagsekta sé íþyngjandi ákvörðun og að fyrirtækið eigi fjárhagslegra hagsmuna að gæta. Eins og málsatvikum sé háttað þyki rétt að fresta dagsektunum, enda liggi ekki fyrir knýjandi ástæður sem geri það að verkum að varhugavert sé að bíða niðurstöðu úrskurðarnefndarinnar um ágreiningsefni málsins.
