Um er að ræða gamalt ferðaklósett sem talið hefur verið tengjast Bítlinum Ringo Starr sem kom fram um verslunarmannahelgina 1984 í Atlavík.
Í þáttunum eru skoðaðir hlutir sem tengjast sérstökum atburðum í sögu þjóðarinnar og er óhætt að segja að ferðaklósettið sé einn þeirra. Í þættinum var reynt að komast að sannleikanum um klósettið og um leið var fræðst um útihátíðina sem Stuðmenn héldu þetta sumar árið 1984.
Viktoría Hermannsdóttir og Sigurður Helgi Pálmason eru umsjónarmenn þáttarins og birti Viktoría áhugaverða færslu á Facebook-síðu þáttarins í gærkvöldi þar sem hún varpar ljósi á ákveðnar vendingar í málinu.
„Þættinum hafa borist nýjar ábendingar varðandi ferðaklósettið sem geymt hefur verið í skógræktinni Hallormsstað frá Atlavíkurhátíðinni árið 1984 þegar Ringo Starr kom þar fram,“ segir Viktoría og bætir við að ábendingin hafi komið frá Jóhanni Hlíðari Harðarsyni.
„Hann segir að þetta ferðaklósett hafi alls ekki verið á Hallormsstað árið 1984 heldur árið 1985 og því ómögulegt að halda því fram að bítillinn hafi notað klósettið. Jóhann Hlíðar var að vinna í Skeljungsbúðinni í Síðumúla sumarið 1985 og segist þekkja klósettið þaðan. Hann hafi sjálfur farið með það í Atlavík,“ segir Viktoría sem hefur eftir Jóhanni Hlíðari eftirfarandi:
„Þannig er að ég fór á útihátíðina í Atlavík árið 1985. Ég vann það sumar, eins og mörg önnur sumur, í Skeljungsbúðinni í Síðumúla. Við seldum ferðaklósett meðal annars. Rétt fyrir lokun á föstudeginum, þegar ég var að fara að loka og hendast út á flugvöll með vinum mínum til að skemmta mér í Atlavík í 3 sólarhringa, hringir Jakob Frímann Magnússon í búðina. Stuðmenn voru komnir austur og án salernisaðstöðu við sviðið. Hann spurði hvort ég gæti sent þeim eitt ferðasalerni í snarhasti. Ég sagðist einmitt vera á leiðinni og tæki það bara með mér.“
Er haft eftir Jóhanni Hlíðari að hann hafi farið með ferðaklósettið með sér og setið með það í fanginu í flugvélinni á leiðinni austur. Hann hafi svo brugðið sér baksviðs í upphafi kvölds, afhent Jakobi klósettið og fengið að velja sér eitt lag að launum. Er tekið fram að lagið Í bláum skugga hafi orðið fyrir valinu.
Þá kemur fram í færslu Viktoríu að Jóhann Hlíðar hafi reynt að koma þessari ábendingu varðandi klósettið áleiðis en á það hafi ekki verið hlustað.
„Auðvitað þekkti ég klósettið. Og þetta var 1985 árið eftir að Ringo kom til Íslands. Þannig að hvorki hann né Barbara Bach hafa nokkurn tíma sest á þetta klósett, sama hvað menn fyrir austan segja,” er haft eftir Jóhanni Hlíðari.
Í lok færslunnar spyr Viktoría:
„Hvað segja áhorfendur um þetta? Er möguleiki að það hafi verið annað klósett í Atlavík árið á undan eða er um misskilning að ræða?“
