Ríkisendurskoðun hafnar með öllu „tilhæfulausum aðdróttunum“ Félags atvinnurekenda (FA) um vanhæfi hvað málefni Íslandspósts ohf. varðar. Eins hafnar embættið því að hafa með einhverjum hætti villt um fyrir Alþingi þegar það birti niðurstöður frumathugunar á framkvæmd og eftirliti með lögum um póstþjónustu, en úttektin var birt í mars árið 2024. Þetta kemur fram í tilkynningu frá embættinu en þar er embættið að bregðast við frétt Morgunblaðsins í gær.
Morgunblaðið greindi frá því að FA hafi sent erindi til innviðaráðuneytis þar sem því er haldið fram að Ríkisendurskoðun hafi skort hæfi til að gera áðurnefnda úttekt. Embættið hafi ekki lagt mat á það hvort Póst- og fjarskiptastofnun og síðar Byggðastofnun hafi tekist að uppfylla lögbundið hlutverk sitt. FA telur að Ríkisendurskoðun hafi skautað fram hjá þeim meginbeiðnum sem komu fram í skýrslubeiðni Alþingis. Eins hafi ekki verið dregið fram hvort framlög Íslandspósts vegna veitingar alþjónustu væru rétt reiknuð. FA telur niðurstöður úttektarinnar hafi átt að villa um fyrir Alþingi og hafi Ríkisendurskoðun hjálpað Íslandspósti að stilla upp tölum til að tryggja opinbera hlutafélaginu sem hæst framlög úr ríkissjóði.
Ríkisendurskoðun segir þetta af og frá og tekur fram að FA hafi ekki sent Ríkisendurskoðun afrit af bréfinu og ekki átt í nokkrum samskiptum við embættið vegna „þessara aðdróttana“.
„Er hér um að ræða endurtekið efni af hálfu félagsins eftir birtingu frumathugunarinnar án þess að það hafi með nokkrum hætti leitast við að rökstyðja endurteknar dylgjur sínar eða afla skýringa sem varða hlutverk eða stjórnsýslu Ríkisendurskoðunar. “
Niðurstöður úttektarinnar séu skýrar og standi óhaggaðar. Margar þær spurningar sem komu í úttektarbeiðni Alþingis hafi ekki beinst að lögbundnu hlutverki og verksviði Ríkisendurskoðunar.
„Það er t.d. ekki hlutverk embættisins að túlka og skýra lög. Jafnframt lutu margar spurningar að málum sem þegar höfðu fengið úrlausn hjá tilskildum eftirlitsaðilum en Ríkisendurskoðun endurskoðar ekki þær ákvarðanir. Engu að síður leitaðist Ríkisendurskoðun við að svara spurningum Alþingis alfarið í samræmi við fyrirliggjandi staðreyndir.“
Ríkisendurskoðun segir það alvarlegt að saka ríkisendurskoðanda um að villa um fyrir Alþingi enda sé ríkisendurskoðandi trúnaðarmaður þingsins að lögum og ábyrgur gagnvart því við endurskoðun og eftirlit með rekstri og fjármunum ríkisins.
„Samkvæmt lögum er ríkisendurskoðandi endurskoðandi Íslandspósts ohf. Athugun og endurskoðun á réttleika rekstrarupplýsinga er lögbundið hlutverk embættisins og skapar því ekki vanhæfi í störfum sínum. Eins og dæmin sanna geta vissulega fylgt opinberum rekstri álitamál sem takast á við hinar ýmsu skoðanir og viðskiptalega hagsmuni á markaði. Við störf Ríkisendurskoðunar er horft til þess að gagnrýni beri mestan árangur ef hún er málefnaleg og vel rökstudd.“
