Virginia Giuffre, sem var ein af þeim fyrstu til að saka bandaríska auðkýfinginn og kynferðisafbrotamanninn Jeffrey Epstein um að hneppa sig í kynlífsmansal, er látin. Giuffre öðlaðist heimsfrægð þegar hún sakaði Andrés Bretaprins um að vera meðal þeirra sem beittu hana kynferðislegu ofbeldi á meðan hún var föst í viðjum Epstein. Andrés neitaði ásökununum en gerði það með svo ótrúverðugum hætti að hann neyddist á endanum til að draga sig í hlé frá konunglegum skyldustörfum.
Giuffre sem var bandarísk var 41 árs þegar hún lést á heimili sínu í Ástralíu. Hún var 41 árs og lætur eftir sig þrjú börn en dánarorsökin er sjálfsvíg. Fjölskylda hennar segir í tilkynningu að misnotkunin sem hún varð fyrir hafi á endanum einfaldlega orðið of þung byrði fyrir hana.
Hún var aðeins á táningsaldri þegar hún lenti í klónum á Epstein í kringum aldamótin. Andrés prins og Epstein voru vinir en Giuffre sagðist hafa verið misnotuð af prinsinum, að áeggjan Epstein, þegar hún var aðeins 17 ára gömul, árið 2001 og síðan aftur eftir að hún varð 18 ára.
Um áratug síðar steig Giuffre opinberlega fram með ásakanir sínar í garð Jeffrey Epstein og vinkonu hans Ghislaine Maxwell sem hafði upphaflega lokkað Giuffre til Epstein. Giuffre starfaði þá í heilsulind í eigu Donald Trump.
Giuffre varð eftir að hún opinberaði ásakanir sínar kraftmikil baráttukona gegn kynferðisofbeldi.
Maxwell afplánar nú 20 ára fangelsisdóm. Epstein lést í fangelsi árið 2019. Giuffre ásakaði Andrés prins um að hafa misnotað hana nokkrum árum eftir að hún ásakaði Maxwell og Epstein. Prinsinn neitaði öllu en ótrúverðug neitun hans í sjónvarpsviðtali árið 2019, þar sem hann sagðist meðal annars ekki vera fær um að svitna, varð á endanum til að hann hefur ekki síðan gegnt konuglegum skyldustörfum. Því má segja að Giuffre hafi fellt prinsinn. Þau sömdu síðar um að hún myndi láta af málarekstri gegn honum en í staðinn greiddi prinsinn henni háa peningaupphæð.
Giuffre náði sé hins vegar aldrei af þeirri misnotkun og ofbeldi sem hún varð fyrir á yngri árum.
