Fjölskylduráð Múlaþings hefur hafnað því að veita fjölskyldu skólaakstur eftir flutning jafn vel þó að gamli skóli barnanna sé mun nær en skólinn í þeirra skólahverfi. Minnihlutinn telur að sveitarfélagið sé að brjóta á skuldbindingum sínum sem þátttakandi í verkefninu Barnvæn sveitarfélög UNICEF.
Málið hefur verið í vinnslu hjá sveitarfélaginu síðan árið 2022. Hjón sem fluttu úr þéttbýlinu í Fellabæ út fyrir bæinn en vildu halda börnunum í Fellaskóla.
Skólahverfamörkin fara hins vegar eftir eldri hreppamörkum, það er fyrir sameiningu Fljótsdalshéraðs sem rann seinna inn í Múlaþing. Samkvæmt því ættu börnin að fara í skóla á Brúarási, þrátt fyrir að aksturstíminn þangað sé 40 mínútur en aðeins 12 til 15 mínútur að Fellaskóla.
Vegna þessa hafnaði meirihluti fjölskylduráðs á endanum að veita fjölskyldunni skólaakstur með fimm atkvæðum gegn tveimur atkvæðum fulltrúa Austurlistans.
Rituðu þeir harðorða bókun gegn ákvörðuninni og sögðu að samfélagið hefði breyst líkt og sveitarfélagamörkin og forsendur fyrir núverandi fyrirkomulagi væru ekki til staðar lengur. Börnin sækja sinn skóla í Fellabæ þar hafa þau sín félagslegu tengsl. Næsta haust verða systkinin fleiri sem munu sækja skóla í Fellabæ.
Vísa þeir í reglur um skólaakstur þar sem segi að sveitarfélög beri ábyrgð á öryggi og velferð nemenda í skólaakstri. Sveitarstjórnir setji reglur um fyrirkomulagið sem taki mið af umhverfisaðstæðum og slíkar reglur eigi að endurskoða reglulega. Það hafi ekki verið gert í Múlaþingi heldur haldið fast í eldri skiptingu, frá því fyrir árið 2004.
„Þann 11. mars 2022 gerist Múlaþing formlega þátttakandi í verkefninu Barnvæn sveitarfélög UNICEF. Tveir af þeim grunnþáttum sem Múlaþing skuldbatt sig til að vinna eftir er að fara eftir því annars vegar sem er barninu fyrir bestu og hins vegar að öll börn væru jöfn,“ segir í bókun fulltrúa Austurlistans, Jóhanns Hjalta Þorsteinssonar og Ævars Orra Eðvaldssonar. „Fulltrúar Austurlistans telja að hér sé brotið gegn þeim skuldbindingum.“
Er meðal annars vísað til þess að ekki sé alltaf farið eftir skólahverfamörkunum. Börnum í Skriðdal sé til að mynda ekið í Fellaskóla þó að tiltekið sé að dalurinn sé í skólahverfi Egilsstaðaskóla.
Foreldrarnir sem sóttu um skólaaksturinn þurfi hins vegar sjálf að keyra börnin í skóla í Fellabæ og verður atvinnuþátttaka þeirra að taka mið af því.
„Sveitir í Múlaþingi eru í nauðvörn og endurnýjun ábúenda í sveitum er ekki slík að hún dugi til að halda í horfinu. Sveitirnar eldast og skólabörnum úr dreifbýli hefur fækkað stórkostlega á síðustu áratugum. Hér er fjölskylda sem kýs að flytja á æskustöðvar annars foreldrisins. Múlaþingi er í lófa lagið að veita stuðning og breyta fyrirkomulaginu við upphaf næsta skólaárs,“ segja fulltrúarnir.
