Borið hefur á aukningu misheppnaðra lýtalækninga í Kína. Nefið á kínverskri leikkonu byrjaði að rotna af eftir eina slíka aðgerð.
Breska ríkissjónvarpið greinir frá þessu í heimildaþættinum BBC Eye.
Gao Liu er 42 ára kínversk leikkona sem leikið hefur bæði í vinsælum sjónvarpsþáttum og kvikmyndum í heimalandinu. Hún er ein af fjölmörgum kínverskum konum sem hafa fundið sig knúna til þess að breyta útliti sínu með lýtaaðgerðum.
Í heimildaþættinum, sem kallast Make Me Perfect: Manufacturing Beauty in China, er sagt og sýnt frá því þegar Liu gekkst undir nefaðgerð á stofu sem kallast She´s Times í borginni Guangzhou árið 2020. En því hefði hún betur sleppt.
Aðgerðina gerði skurðlæknir að nafni He Ming, sem var titlaður aðalskurðlæknir She´s Times og sérfræðingur í nefaðgerðum. Eftir sjö daga var hins vegar farið með Liu á spítala því að nefið var að rotna af henni.
Ástæða rotnunarinnar var sú að blóðflæðið í hinu nýja nefi var alls ekki nógu gott. Myndaðist drep á nefbroddinum sem stækkaði og stækkaði.
Liu hefur farið í tvær skurðaðgerðir til þess að reyna að láta laga nefið en það er enn þá skemmt. Greint er frá því að heilbrigðiseftirlit Guangzhou hafi tilkynnt þvinganir gagnvart She´s Times og lækninum Ming. Hann er hins vegar enn þá starfandi við fagið.
Í frétt breska blaðsins Daily Mail um málið kemur fram að lýta eða fegrunaraðgerðir hafi aldrei verið jafn vinsælar í Kína og nú. Árlega fari um 20 milljónir Kínverja í slíkar aðgerðir, 80 prósent af þeim konur og að meðaltali 25 ára gamlar.
Aukin velsæld og áhrif samfélagsmiðla eru taldar helstu ástæðurnar fyrir fjölgun aðgerðanna. Áður fyrr voru slíkar aðgerðir mikið feimnismál í þessu næstfjölmennasta landi heims.
Þá hafa aðgerðirnar breyst mikið. Áður fyrr leituðust konur eftir samhverfu í andlitinu, ákveðinni kjálkalínu og beinu nefi. Í dag er ónáttúrulegt útlit orðið vinsælla. Það er útlit sem einkum sést í teiknimyndum, barnaleg andlit með stærri augu. Gjarnan er bótox sett aftan við eyrun til að andlitið líti út fyrir að vera minna og augnlokin eru víkkuð til að augun virðist stærri eins og í teiknimyndafígúrum í Anime teiknimyndum.
Þá eru komin út smáforrit, eða öpp, eins og SoYoung og GengSei, sem greina andlit fólks og koma með ábendingar um hvað megi betur fara í andlitsfallinu. Forritin mæla svo með lýtalæknastofum sem framkvæmda aðgerðirnar. Vitaskuld greiða stofurnar hönnuðum forritana fyrir þetta.
En þar sem eftirspurnin eftir lýtaaðgerðum hefur vaxið í veldisvexti í Kína á undanförnum árum er ljóst að framboðið á hæfum lýtalæknum hefur ekki gert það. Þess í stað hafa vanhæfir einstaklingar komist, margir hverjir réttindalausir, að og þar með hefur slysunum fjölgað.
