Donald Trump Bandaríkjaforseti heldur núna ræðu í Rósagarðinum í Hvíta húsinu í Washington þar sem hann tilkynnir um tolla á innfluttum vörum.

„Þetta er dagur frelsunar og dagurinn þegar bandarískur iðnaður endurfæddist,“ sagði forsetinn í byrjun ræðunnar. „Við áttum amerískan draum sem við heyrum ekki mikið um núna.“ Sagði hann að bandarískir verkamenn og iðnaðarmenn hafi verið arðrændir en nú sé því lokið.

„Einn mikilvægasti dagurinn í sögu Bandaríkjanna, dagur þar sem efnahagslegu sjálfstæði Bandaríkjanna er lýst yfir,“ sagði Trump. Hann sagði að bæði fjandmenn og vinaþjóðir hefðu beitt Bandaríkin órétti með ofurtollum. „Í mörgum tilvikum er vinurinn verri en fjandmaðurinn.“

Trump hefur nú tilkynnt að 25% tollur verði lagður á alla innflutta bíla.

Trump segir ennfremur að vörur frá Evrópusambandinu fái á sig 20% toll.

Hins vegar fær Bretland aðeins á sig 10% toll.

Japan fær á sig 24% toll, Suður-Kórea 25%, Víetnam 46% og Swiss 31%. 

Lagður verður að minnsta kosti 10% tollur á allan innflutning. Þetta þýðir að 10% tollur leggst á innflutning frá Íslandi.

Trump boðaði með þessum tollum upprisu bandarísks iðnaðar og sér fyrir sér að fyrirtæki muni streyma inn til landsins með starfsemi sína, sem aldrei fyrr, meðal annars lyfjafyrirtæki. Enginn tollur verður lagður á vörur frá fyrirtækjum sem eru með starfsemi í Bandaríkjunum.

Fréttinni hefur verið breytt