Jónas Már Torfason, lögfræðingur og fyrrverandi blaðamaður, segir Sjálfstæðisflokkin og Morgunblaðið í krísu. Blaðamenn sem stundi alvöru blaðamennsku hljóti að íhuga stöðu sína þegar trúverðugleiki blaðsins fari fjarandi og sjálfstæðir pennar séu ávíttir fyrir skrif sín.
Í færslu á samfélagsmiðlum bendir Jónas Már á að hann hafi ungur verið í Sjálfstæðisflokknum en hafi síðan blessunarlega þroskast frá því. Sem fyrrverandi flokksmaður vilji hann þó segja nokkur orð og rýna til gagns.
„Kynni mín af Sjálfstæðisflokknum og sú grýla sem maður hefur síðan þekkt, eða allavega ímyndað sér, er að hann þekkti þjóðarsálina. Hann stóð eitt sinn fyrir hugmyndum um einstaklingsfrelsi og sjálfstæði, sem að mörgu leyti kallast á við þá ímynd sem Íslendingar hafa af sjálfum sér sem þjóð,“ segir Jónas Már í færslunni. „Maður bar óttablendna virðingu fyrir Sjálfstæðisflokknum sem stofnun í samfélaginu. Þótt enn sé samviskusamlega farið með þessi gömlu sakrament er hljómurinn innantómur. Flokkurinn hefur löngu týnt rótum sínum; stefnan varð einfaldlega sú að stjórna.“
Spyr hann hvað hafi orðið um frelsismálin í síðustu ríkisstjórn. Báknið hafi blásið út í tíð hennar og það falli þremur „vinstri“ flokkum í hlut að rétta hallareksturinn eftir eyðslufyllerí fjármálaráðuneytis Sjálfstæðismanna.
„Og hvað gerist þegar flokkur sem hefur það sem stefnu sína að stjórna missir stjórnina? Hann tvístrast í allar áttir og veit ekkert hvert er sitt erindi,“ segir Jónas Már. „Nú hafa Sjálfstæðismenn verið rúmlega 100 daga í stjórnarandstöðu. Hvað hafa þeir staðið fyrir? Að berjast með kjafti og klóm fyrir staðsetningu félagsmiðstöðvar sinnar á Alþingi, að hlaupa upp með ýmist persónulegar eða ómálefnalegar ásakanir á hendur ráðherrum, sem allir sjá í gegnum, og að nánast hóta því að ganga í sjóinn út af plasttappafrumvarpinu — frumvarpi sem þeir bera sjálfir ábyrgð á og kusu allir með þegar á daginn kom, það var nú meira prinsippmálið.“
Þá tekur hann einnig fyrir Morgunblaðið sem hann segir „stærsta aðildarfélag flokksins.“ Blaðið hafi alltaf talað undir rós fyrir stefnu Sjálfstæðisflokksins en alltaf haft þá ímynd að vera alvörugefinn fjölmiðill. En einhvern tímann á síðasta ári hafi blaðið farið að stunda grímulausan áróður.
„Í vetur hefur Mogginn flutt fréttir af ótrúlegustu samsæriskenningum og nú berast fregnir af því að sjálfstæðir pennar blaðsins séu ávíttir fyrir gagnrýnin skrif, fyrir að benda á örvæntingu Sjálfstæðismanna,“ segir Jónas Már. En þá er hann að meina fréttir af því að Kolbrún Bergþórsdóttir blaðamaður hafi verið skömmuð af Andrési Magnússyni fulltrúa ritstjóra fyrir að gagnrýna Sjálfstæðisflokkinn og þingflokksformanninn Hildi Sverrisdóttur í grein.
„Mogginn má alveg stunda þennan áróður mín vegna. Afleiðingin er hins vegar sú að trúverðugleiki blaðsins fer fjarandi því landinn er nú eftir allt betur gefinn en svo að sjá ekki í gegnum svona leikþátt. Það er miður fyrir aðra blaðamenn á Morgunblaðinu, sem stunda alvöru blaðamennsku og sem hljóta að íhuga stöðu sína í þessu öllu saman. Ég get ekki ímyndað mér að það sé til að bæta ánægju í starfi að eiga von á tiltali fyrir að nota ekki réttan tón í fréttaflutningi af stjórnmálum,“ segir Jónas Már að lokum. „Kannski er þetta bara eðlilegt. Þegar stofnanir glata sjálfsmynd sinni og verða innantómar — gleyma því til hvers þær voru reistar — fyllast þær að lokum af þeim sem hafa ekkert að segja. Það er dapurlegt að sjá Sjálfstæðisflokkinn, og blaðið sem hefur fylgt honum í gegnum lýðveldissöguna, líða svona undir lok sem sjálfstæðar og málefnalegar raddir.“
