Jóhannes Þór Skúlason, framkvæmdastjóri Samtaka ferðaþjónustunnar, segir að Ísland sé að tapa samkeppninni við Noreg og Finnland um upplifunarferðir á norðlægum slóðum.

Þetta segir Jóhannes í samtali við Morgunblaðið í dag, en í frétt blaðsins er greint frá því að hrun hafi orðið í komum breskra ferðamanna til landsins. Bent er á það að í febrúar hafi um 41 þúsund manns komið frá Bretlandi en í mars var fjöldinn kominn niður í um 18.500. Fækkunin frá því í mars 2024 er 47%.

„Norðmenn og Finn­ar hafa lagt mikla áherslu á að aug­lýsa sín­ar norðlægu slóðir, í Bretlandi. Þar er kom­inn markaður sem er ódýr­ari en við og bet­ur aug­lýst­ur held­ur en okk­ar núna,“ segir Jóhannes um málið.

Í fréttinni er einnig rætt við Hallgrím Lárusson, framkvæmdastjóra og eiganda Snæland Grímsson ferðaskrifstofu, en hann segist hafa horft upp á þessa þróun síðan Íslandsstofa hætti með neytendamarkaðssetningu á samfélagsmiðlum árið 2022. Kennir hann stjórnvöldum um þessa þróun.

„Ef stjórn­völd vilja efla ferðaþjón­ustu þarf að vinna bæði í markaðssetn­ingu og skapa fyr­ir­tækj­um sam­bæri­leg­ar aðstæður og í sam­keppn­islönd­un­um. Hér er verið að skera ferðaþjón­ust­una niður við trog með þeim af­leiðing­um að fólki sem kem­ur til lands­ins fækk­ar,“ segir Hallgrímur í Morgunblaðinu þar sem nánar er fjallað um málið.