Landsréttur hefur nú staðfest úrskurð Héraðsdóms Suðurlands um gæsluvarðhald yfir þremur sakborningum vegna rannsóknar lögreglu á andláti Hjörleifs Hauks Guðmundssonar, 65 ára gamals manns frá Þorlákshöfn, sem fannst þungt haldinn í Gufunesi í byrjun mars og lést skömmu síðar af völdum misþyrminga. Hafa mennirnir verið úrskurðaðir í gæsluvarðhald til 7. maí. Samkvæmt frétt RÚV í fyrradag hafa sjö manns stöðu sakbornings í málinu en DV hefur fengið vísbendingar um að fleiri gætu tengst því, allt að 12 manns.
Sveinn Kristján Rúnarsson, yfirlögregluþjónn hjá lögreglunni á Suðurlandi, vill ekki tjá sig um hvað margir eru taldir tengjast málinu. Varðandi spurningu um hverjir séu taldir höfuðpaurar bendir Sveinn einfaldlega á þá staðreynd að þrír séu í gæsluvarðhaldi. Mennirnir eru ekki lengur í einangrun.
Eins og DV hefur áður greint frá var aðförin að Hjörleifi svokölluð tálbeituaðgerð og kom í kjölfar samskipta við hann á samfélagsmiðlum. Sakborningar segja hann hafa átt í samskiptum við aðila sem hann taldi vera 11 ára barn og hafi Hjörleifur síðan gengist við því. Rétt er að benda á í þessu samhengi að Hjörleifur heitinn þjáðist af heilabilun. Ekkert hefur komið fram sem bendir til að hann hafi farið til fundar við barn né að sakborningar telji sig hafa upplýsingar um að hann hafi brotið gegn börnum.
DV hefur heimildir fyrir því að lífsýni úr Hjörleifi hafi fundist í iðnaðarhúsnæði fyrir utan Reykjavík. Hafi húsnæðið verið rannsakað og blóð fundist úr hinum látna. Eins og áður hefur komið fram fannst hann þungt haldinn í Gufunesi þar sem vegfarandi varð hans var og hafði samband við viðbragðsaðila. Hjörleifur var hins vegar áður numinn á brott af heimili sínu í Þorlákshöfn.
Að minnsta kosti tveir bílar hafa verið til rannsóknar í málinu. Annar þeirra, svört Tesla, mun geyma mikið af sönnunargögnum þar sem upptökubúnaður í bílnum tók sjálfkrafa upp efni sem vísar á sakborninganna. Sakborningarnir huldu andlit sín en það kom ekki í veg fyrir að lögregla gæti borið kennsl á þá.
Í samtali við DV vildi Sveinn ekkert tjá sig um rannsókn á iðnaðarhúsnæði né bílum. Aðspurður segir hann að rannsókn í málinu miði mjög vel en hann getur ekki sagt til um hvenær henni verður lokið.
DV hefur áður greint frá því að hinir grunuðu kúguðu um þrjár milljónir af Hjörleifi er þeir misþyrmdu honum. Um þetta hefur lögregla ekki viljað tjá sig sérstaklega en segir að til rannsóknar sé manndráp, frelsissvipting og fjárkúgun. Samkvæmt heimildum DV hafði fjármununum verið umbreytt áður en mennirnir voru handteknir og hefur ekki tekist að endurheimta þá.
Lítið er vitað um tengsl sakborninga við Hjörleif. Ljóst er að einhverjir þeirra áttu í samskiptum við hann á samfélagsmiðlum sem hluti af tálbeituaðgerð. DV hefur ennfremur heimildir fyrir því að tengsl séu á milli fjölskyldu eins sakborningsins og Hjörleifs en sá sakborningur og Hjörleifur þekktust þó ekki.
