Um þessar mundir er fátt ef þá nokkuð sem er rætt um meira í kanadísku þjóðfélagi en ógnanir Donald Trump forseta Bandaríkjanna í garð landins. Hann hefur meðal annars skellt tollum á kandadískar vörur og aðföng sem flutt eru til Bandaríkjanna og rætt opinskátt um að innlima Kanada. Ljóst er að Kanadamönnum stendur ógn af þessu framferði forsetans en það hefur hins vegar haft ákveðna kosti í för með sér ekki síst fyrir heilbrigðiskerfi landsins.
Í umfjöllun kanadíska ríkisútvarpsins CBC kemur fram að fjöldi bandarískra lækna hafi sýnt því áhuga að flytja til Kanada og hefja störf þar og einnig er nokkuð um að kanadískir læknar sem hugðust flytja til Bandaríkjanna hafi skipt um skoðun. Þessar aðgerðir Trump virðast því ýta undir aukið framboð af læknum í kanadísku heilbrigðiskerfi.
Rætt er við Marc Ruel, hjartaskurðlækni sem starfað hefur í höfuðborg Kanada, Ottawa. Hann hafði í hyggju að flytja til San Francisco í Bandaríkjunum og hefja þar störf við Kaliforníuháskóla. Hann segir að hann hafi hins vegar ákveðið að vera um kyrrt í Kanada þar sem hann hafi talið það skyldu sína að vera til staðar fyrir föðurland sitt eftir að Trump hóf ógnanir sínar.
Í umfjöllun CBC kemur fram að Ruel sé mjög framarlega á sínu sviði og hafi meðal annars þróað nýjar aðferðir við hjartaaðgerðir sem gera það að verkum að þörf er á minna inngrippi í líkama sjúklingsins. Hann hefur í krafti stöðu sinnar hjá rannsóknarstofnun, við Háskólann í Ottawa sem tileinkuð er hjartalækningum, getað deilt þekkingu sínu og aðferðum víða um heim. Ruel segist vera læknir og ekki vilja blanda sér í stjórnmál en að framferði Trump hafi neytt hann til þess.
Ruel segir ljóst að afleiðingarnar af ákvörðun hans verði meðal annars þær að sjúklingar í Bandaríkjunum muni ekki njóta góðs af þeim aðferðum sem hann hafi þróað.
Þegar kemur að bandarískum læknum sem hafa áhuga á að halda til starfa í Kanada kemur fram í umfjöllun CBC að um nokkurn fjölda sé að ræða. Fréttamenn CBC hafa rætt við að minnsta kosti tvo og við einn bandarískan lækni sem hefur nú þegar hafið störf í Kanada.
Læknarnir þorðu ekki að koma fram undir nafni af ótta við hefndaraðgerðir Trump-stjórnarinnar en skýrðu þessi vistaskipti einkum með heilbrigðisráðherranum Robert F. Kennedy jr. og fullyrðingum hans um skaðsemi bólusetninga og fjandskap ráðherrans í garð læknavísinda.
Fyrirtæki sem sérhæfir sig í að ráða kanadíska lækna í störf í Bandaríkjunum og bandaríska lækna til starfa í Kanada greinir frá því að eftirspurn fyrrnefnda hópsins eftir störfum hafi hríðfallið en vaxið til muna hjá þeim síðarnefnda.
Áhugi kanadískra lækna á störfum í Bandaríkjunum sé orðinn sáralítill en hið gagnstæða eigi við um áhuga bandarískra lækna á störfum í Kanada.
Bandarískir læknir séu teknir í viðtöl fimm daga vikunnar í stað þriggja daga vikunnar áður og um 60 læknar að meðaltali skrái sig í hverjum mánuði á vefsíðu fyrirtækisins vegna áhuga á störfum í Kanada.
Kanada hefur að undanförnu dregið markvisst úr öllum kerfislægum hindrunum gagnvart því að bandarískir læknar geti hafið störf í landinu. Það á sérstaklega við um fjölmennasta hérað landsins, Ontario.
Ljóst er að þrátt fyrir þá erfiðleika sem steðja að ekki síst í kanadísku efnahagslífi vegna Donald Trump að þá virðist heilbrigðiskerfi landsins vera að græða á aðgerðum hans.
