Ónefndur einstaklingur virðist mjög áhugasamur um starfsemi Vestmannaeyjabæjar og fyrirtækja í eigu bæjarins. Sendi viðkomandi sveitarfélaginu 219 formlegar fyrirspurnir á síðasta ári.
Greint er frá þessu í fundargerð síðasta fundar bæjarráðs Vestmannaeyja en í fundargerðinni segir að fjöldi formlegra fyrirspurna á grundvelli upplýsingalaga til Vestmannaeyjabæjar, er varði hin ýmsu mál sveitarfélagsins og félaga í eigu þess, hafi verið 221 á árinu 2024 og hafi þær allar borist frá einum einstaklingi að tveimur undanskildum.
Ekki virðist ólíklegt að þarna sé á ferðinni sami einstaklingur og sendi bænum 348 formlegar fyrirspurnir árið 2023 en greint var frá því að sá tími sem hafi farið í að svara fyrirspurnunum hafi jafngilt um það bil hálfu stöðugildi starfsmanns.
Fyrirspurnum viðkomandi hefur því farið fækkandi og velta má fyrir sér hvort fari að styttast í að hann verði uppiskroppa með viðfangsefni til að spyrjast fyrir um.
Í fundargerðinni eru efni fyrirspurnanna ekki sundurliðuð og því óljóst um hvað fyrirspyrjandinn spurðist helst fyrir um. Af úrskurðum úrskurðarnefndar upplýsingamála má hins vegar ráða að fyrirspyrjandinn hefur ekki alltaf verið sáttur við svör bæjarins við fyrirspurnum hans.
Hvort fyrirspyrjandinn verður jafn duglegur að spyrjast fyrir um starfsemi Vestmannaeyjabæjar á árinu 2025 á hins vegar eftir að koma í ljós.
