Embætti landlæknis og íslenska ríkið hafa verið sýknuð af kröfu Guðmundar Sævars Sævarssonar, fyrrverandi deildarstjóra öryggis og réttargeðdeildar Landspítalans á Kleppi. Guðmundur krafðist 10 milljón króna miskabóta vegna tjóns af miðlun persónuupplýsinga.
Mál Guðmundar voru til umfjöllunar í fjölmiðlum sumarið 2021. Það er RÚV greindi frá því að hann væri kominn í ótímabundið leyfi frá störfum að beiðni stjórnenda Landspítala vegna ábendinga fyrrverandi og núverandi starfsmanna um aðbúnað og starfsaðstæður. Aðrir fjölmiðlar, meðal annars DV og Morgunblaðið fjölluðu einnig um málið á sínum tíma.
Til grundvallar lá greinargerð samtakanna Geðhjálpar þar sem fjallað var um ofbeldi, lyfjaþvinganir, ógnarstjórnun og mikinn samskiptavanda á réttargeðdeildinni. Síðar var samið um starfslok við Guðmund, sem átti 25 ára starfsreynslu að baki, en hann var afar ósáttur og taldi frásagnir starfsmanna ósannar og að hann hafi verið gerður að blóraböggli í málinu.
Guðmundur höfðaði mál gegn embætti landlæknis og ríkinu síðastliðinn júní vegna miðlunar persónuupplýsinga. Krafðist hann 10 milljón króna í miskabætur vegna tjóns sem hann taldi sig hafa orðið fyrir vegna hennar. En áður hafði hann kvartað til Persónuverndar vegna miðlunar persónuupplýsinga til Geðhjálpar. Það er vegna bréfs sem innihélt upplýsingar um að hann væri kominn í ótímabundið leyfi og annar tekinn við starfi hans.
Persónuvernd úrskurðaði 22. desember árið 2022 að vinnsla landlæknisembættisins samrýmdist ákvæðum laga og væri nauðsynleg til að fullnægja lagaskyldu sem hvíldi á embættinu. Geðhjálp ætti aðild að stjórnsýslumáli hjá embættinu og því yrði að virða lögbundinn upplýsingarétt.
Guðmundur kvartaði til Umboðsmanns Alþingis, bæði vegna þess að landlæknisembættið hefði veitt Geðhjálp stöðu eftirlitsaðila og yfir því að Persónuvernd hefði ekki sinnt lögbundnu eftirlitshlutverki á fullnægjandi hátt. Var Persónuvernd gert að taka málið upp að nýju með áliti 28. ágúst 2023. Í síðari úrskurði Persónuverndar, frá 29. febrúar 2024, kom fram að Geðhjálp hafi ekki verið aðili máls og hafi ekki átt rétt á áðurnefndum upplýsingum.
Þann 12. mars árið 2024 krafðist Guðmundur miskabóta frá landlæknisembættinu sem var hafnað með bréfi um sumarið.
Taldi Guðmundur að um meingerð væri að ræða og að einkalíf hans og æra njóti stjórnarskrárvarðra réttinda sem hefðu verið brotin. Umfang tjónsins hafi verið verulegt í ljósi þeirrar gífurlegu fjölmiðlaumfjöllunar sem spannst um málið í kjölfar miðlunarinnar.
Landlæknisembættið og ríkið töldu skilyrðum skaðabótaábyrgðar ekki fullnægt í málinu. Guðmundur hefði ekki sannað að meint tjón hans mætti rekja til miðlunar upplýsinga til Geðhjálpar um að hann væri kominn í ótímabundið leyfi. Landlæknisembættið sé ósammála því sem komi fram í úrskurði Persónuverndar og telji að miðlunin hafi farið fram í lögmætum tilgangi.
Í niðurstöðu Héraðsdóms Reykjavíkur í dag segir að almennt ríki engin þagnarskylda um það hverjir teljast starfsmenn opinberrar stofnunar. Sé stjórnandi deildar opinberrar stofnunar í leyfi og því ekki við störf séu slíkar upplýsingar ekki háðar þagnarskyldu.
„Rétt eins og forstöðumanni geðþjónustuLandspítala var heimilt að upplýsa í svari til fjölmiðla 31. maí 2021 að stefnandi hefði þegið boð um að fara í leyfi meðan skoðun stefnda embættis landlæknis stæði yfir var téðum stefnda heimilt að veita almenningi, þar á meðal landssamtökum þeirra sem láta sig geðheilbrigðismál varða, upplýsingar um það hverjir veiti réttar-og öryggisgeðdeild forstöðu, sem og það hvort þeir séu við störf eða í leyfi frá störfum og þá eftir atvikum hverjir sinni nú starfinu í þeirra stað,“ segir í niðurstöðu dómsins. Var landlæknisembættið og ríkið sýknað en málskostnaður felldur niður.
