Karl Steinar hélt erindi á ráðstefnu um öryggis- og varnarmál sem ríkislögreglustjóri stóð fyrir í gær. Vísir fjallaði meðal annars um erindi Karls Steinars sem sagði tímabært að opna umræðuna um njósnir Kínverja á Íslandi þó þær séu viðkvæmt mál.
Í erindi sínu, samkvæmt frétt Vísis, vísaði Karl Steinar til Kárhóls í Þingeyjarsýslu á Norðurlandi þar sem til stóð að reisa rannsóknarstöð um norðurslóðir.
Er í fréttinni vísað í tveggja ára gamla umfjöllun Heimildarinnar þar sem fram kom að fulltrúar NATO hefðu áhyggjur af því mögulegt væri að nota stöðina til fjarskiptanjósna.
En kínverska sendiráðið hefur brugðist hart við samkvæmt yfirlýsingu sem birtist á vef þess í morgun.
„Okkur brá við þessa yfirlýsngu, við erum óánægð með hana og mótmælum henni,“ segir meðal annars.
Bent er á það að Kína hafi unnið með Íslandi til að yfirstíga þær áskoranir sem alþjóðlega fjármálakreppan 2008 hafði í för með sér fyrir Ísland.
Í þeirri ólgu sem ríkir í heiminum séu kínversk yfirvöld staðföst í vilja sínum til að efla vináttu við Ísland.
„Við hvetjum viðeigandi stofnun til að leggja til hliðar hroka og hleypidóma og láta af því að koma með tilefnislausar ásakanir og dreifa sögusögnum.”
