Ísabella Sara Tryggvadóttir er að ganga í raðir sænska stórliðsins Rosengard, en hún er keypt þaðan frá Val.

Ísabella er 18 ára gömul og lykilmaður á Hlíðarenda en tekur nú þetta stóra skref í sænska boltann.

Tilkynning Vals
Knattspyrnufélagið Valur og sænska stórliðið Rosengård hafa náð samkomulagi um kaup þess síðarnefnda á hinni 18 ára gömlu Ísabellu Söru Tryggvadóttur frá Val. Ísabella gengur strax til liðs við Rosengård.

„Rosengård er einn stærsti klúbburinn í Skandinavíu kvennamegin og því ljóst að þetta er frábært tækifæri fyrir Ísabellu. Hún framlengdi samningi sínum við okkur um fjögur ár á dögunum en þetta er tækifæri sem býðst ekki á hverjum degi. Við erum afskaplega ánægð fyrir hennar hönd,“ segir Björn Steinar Jónsson formaður knattspyrnudeildar Vals.

„Þetta er gott dæmi um það sem við í Val viljum standa fyrir. Að gefa ungum og efnilegum stelpum tækifæri og ef þær nýta það jafn vel og Ísabella hefur gert gerast góðir hlutir. Vissulega hefði verið frábært að hafa hana hjá okkur áfram en tilboð sænska liðsins var þannig að erfitt var að neita því auk þess sem Ísabella vildi stökkva á þetta tækifæri. Okkur hlakkar til þess að sjá hana þroskast og bæta sig ennfrekar og erum þess fullviss að hún muni ná mjög langt.“

Ísabella Sara Tryggvadóttir kom til Vals frá uppeldisfélagi sínu KR fyrir tímabilið 2023 og hefur verið einn allra efnilegasti leikmaður landsins. Hún á leiki fyrir öll yngri landslið Íslands.