Sjúklingur Michigan í Bandaríkjunum sem gekkst undir líffæraígræðslu í desember síðastliðnum lést um mánuði síðar af völdum hundaæðis. Talið er öruggt að smitið hafi borist í viðkomandi með umræddu líffæri.

NBC News greinir frá þessu.

Frekari upplýsingar um einstaklinginn eða hvaða líffæri um ræðir koma ekki fram, en aðgerðin fór fram í Ohio. Vinna nú yfirvöld í Michigan og Ohio að rannsókn málsins.

Í sameiginlegri yfirlýsingu kemur fram að bráðabirgðarannsókn hafi leitt í ljós að sjúklingurinn hafi smitast í gegnum umrætt líffæri.

Innan við tíu manns deyja að jafnaði á ári hverju í Bandaríkjunum úr hundaæði, en yfirleitt smitast sjúkdómurinn í gegnum bit eða klór frá sýktri skepnu.

Hægt er að meðhöndla sjúkdóminn ef brugðist er skjótt við, en eftir að einkenni koma fram er hann ólæknandi.

Þetta er ekki í fyrsta sinn sem þetta gerist í Bandaríkjunum og er bent á það í frétt NBC News sð árið 2004 hafi þrír látist úr hundaæði eftir að hafa fengið líffæri frá sýktum einstaklingi. Og árið 2013 lést maður í Maryland eftir að hafa fengið nýra úr sýktum einstaklingi.

Sem fyrr segir er hundaæði mjög alvarleg vírussýking sem leggst á taugakerfið. Verði viðkomandi fyrir biti eða klóri eru fyrstu einkenni sjúkdómsins verkir og óþægindi við svæðið sem bitið eða klórað var í. Því næst er það óróleiki, þunglyndi og kvíðaköst. Síðan versnar ástandið og brýst út í ofvirkni, árásargirni, oföndun, aukinni munnvatnsframleiðslu og krömpum.