Vladímír Pútín leggur mikið á sig til að halda upplýsingum um heilsufar sitt leyndum. Þegar hann ferðast til útlanda hefur einn lífvarða hans það mikilvæga starf að safna saur hans saman til að hægt sé að taka hann með heim til Moskvu.

En nú virðist tölvuþrjótum hafa tekist að komast yfir upplýsingar um erfðaefni forsetans. Bild og TSN skýra frá þessu og segja að rannsóknin á erfðaefninu hafi verið gerð af rannsóknarfyrirtækinu Genotek í desember 2022.

Niðurstaða hennar er að erfðafræðileg samsetning Pútíns tilheyrir hópnum E1b1b-E-V13 sem er að sögn sjaldgæfur í Rússlandi en er hins vegar algengur í Kósóvó.

Þessi samsetning hefur verið tengd við aukna hættu á að fá ákveðna sjúkdóma, til dæmis blöðruhálskrabbamein.

Orðrómar um heilsufar Pútíns hafa verið á sveimi árum saman, að sögn einnig hjá vestrænum leyniþjónustustofnunum.

Dan Sabbagh, ritstjóri varnar- og öryggismála hjá The Guardian, skrifaði til dæmis 2022 að heimildarmenn innan leyniþjónustustofnana hefðu tekið eftir „miklum breytingum“ á persónuleika Pútíns frá 2017.