Svikapóstum rignir nú inn á tölvupóstföng landsmanna þar sem látið er líta út eins og um sé að ræða póst frá Skattinum. Skatturinn bendir fólki sem hafi orðið fyrir barðinu á svikahröppum að hafa samband við lögreglu.
„Skattendurgreiðsla þín bíður staðfestingar,“ stendur í tölvupósti sem fjöldi manns hefur fengið. Pósturinn er merktur er „Skattstofnun Íslands.“ Þetta er hins vegar svikapóstur og ekki til nein stofnun sem heitir þessu nafni.
Tímasetningin er vafalaust engin tilviljun en aðeins tæpar tvær vikur síðan landsmenn áttu að skila sínum skattaskýrslum fyrir síðasta ár. Margir bíða þess í ofvæni að sjá hvað þeir fá endurgreitt eða þurfa að borga.
„Það er ómögulegt að segja hvort í þessu tilfelli þrjótar hafi hitt á réttan tíma fyrir tilviljun eða hvort það var með ráðum gert,“ segir Jónas Magnússon, sérfræðingur á þjónustu og upplýsingasviði Skattsins. „Það má þó segja að svikapóstahrinur sem við höfum séð á undanförnum misserum hafa verið mjög sannfærandi.“
Skatturinn bendir fólki sem hefur orðið fyrir barðinu á svikahröppum sem þessum að hafa samband við lögreglu.
„Ef fólk fær sendingu og er í vafa um réttmæti er gott ráð er að smella ekki á hlekki í tölvupóstum eða SMS-um heldur opna nýjan vafraglugga og finna vefsíðu stofnunarinnar eða fyrirtækisins upp á eigin spýtur,“ segir Jónas. „Sértæk erindi sem varða málefni einstaklinga eða fyrirtækja er hægt að finna á þjónustuvef Skattsins eða í Stafrænu pósthólfi á Ísland.is.“
Gott er að hafa í huga að einkenni netsvika eru gjarnan:
„Við hjá Skattinum forðumst að senda tölvupósta með hlekkjum og gefum einnig sem minnst upp í póstinum sjálfum um hvað erindið varðar,“ segir Jónas aðspurður um hvernig fólk geti þekkt raunveruleg skilaboð frá Skattinum. „Við vísum fólki frekar inn á þjónstuvefinn eða í Stafrænt pósthólf á Ísland.is.“
