Össur Skarphéðinsson, fyrrverandi ráðherra, veltir því upp hvort RÚV þurfi ekki að kanna mögulegan upplýsingaleka frá Áslaugu Örnu Sigurbjörnsdóttur, þingmanni Sjálfstæðisflokksins, í tengslum við mál Ásthildar Lóu Þórsdóttur, fráfarandi barna- 0g menntamálaráðherra.
Fyrrverandi tengdamóðir manns sem gat Ásthildi Lóu barn er hann var á sextánda ári og Ásthildur var 22 ára segist hafa beðið um fund með forsætisráðherra um málið. Sakar hún forsætisráðherra um trúnaðarbrest þar sem forsætisráðherra sagði Ásthildi frá fundarbeiðninni. Fréttir í þessa veru hafa verið gagnrýndar þar sem ljóst sé að konan hafi aflétt trúnaði á þessum upplýsingum með því að segja að Ásthildur mætti sitja fundinn líka. Sýnist sitt hverjum um þetta.
Einnig hefur komið fram að tengdamóðirin var í sambandi við Áslaugu Örnu. Össur segir í Facebook-færslu að þögn Áslaugar Örnu í málinu sé undarleg í ljósi þess hvað margir Sjálfstæðismenn hafa tjáð sig um það:
„Þarf ekki að rannsaka þátt Áslaugar Örnu?
„Hrútakofinn“ á Mogganum og ýmsir þingmenn Sjálfstæðisflokksins ásamt öðrum hafa velt sér upp úr „lekum“ úr forsætisráðuneytinu og reynt að koma höggi á Kristrúnu Frostadóttur forsætisráðherra. Af þingmönnum má nefna Hildi Sverrisdóttur og jafnvel nýkjörinn formann Guðrúnu Hafsteinsdóttur. Hins vegar vekur athygli ærandi þögn Áslaugar Örnu, yfirlýsingaglaðasta þingmanns flokksins, sem þó hefur ekki sparað sig um hvers kyns málefni eftir fallið í nýafstöðnu formannskjöri.
Nú er hins vegar upplýst að Áslaug Arna vissi af málinu löngu áður en það breikaði í fjölmiðlum. Það setur meintan „leka“ á upplýsingum Ólafar í allt annað og alvarlegra samhengi.
Grafin inn í frétt RÚV í gærkvöldi er frásögn af því að degi eftir að Ólöf tengdamóðir sendi forsætisráðuneytinu „langan og ítarlegan tölvupóst þar sem hún rakti erindi sitt“ sendi hún líka tölvupóst á Áslaugu Örnu. Var það kanski sami tölvupósturinn?
Samkvæmt frétt RÚV hafði því fólk í innsta hring Sjálfstæðisflokksins upplýsingar um málið undir höndum löngu áður en það komst til fjölmiðla . RÚV hefr til þessa kosið að fara ekki dýpra í málið. Er það til að vernda heimildarmenn sína?
Það var forystu Sjálfstæðisflokksins til minnkunar að freista þess að nota þetta mál til að sverta mannorð forsætisráðherra. Sérstaklega þegar haft er í huga að skv. RÚV hafði fallin erfðaprinsessa í flokknum upplýsingar um málið. Ætlar RÚV virkilega ekki að ganga eftir því að Áslaug Árna skýri stöðu sína í málinu?
Eftir ásakanir úr Sjálfstæðisflokknum um að forsætisráðherra sé ábyrg fyrir lekum af erindi sem henni barst er það skýlaus krafa að Áslaug Arna geri hreint fyrir sínum dyrum. Hvað gerði hún við þær upplýsingar sem henni bárust um málið?“
