Að sögn Jóns Gunnars Þórhallssonar, yfirlögregluþjóns hjá Lögreglunni á Suðurlandi, er mynd að komast á viðamikla rannsókn lögreglu á andláti 65 ára gamals manns frá Þorlákshöfn. Maðurinn fannst þungt haldinn við göngustíg í Gufunesi fyrir viku síðan og lést skömmu síðar á sjúkrahúsi.
Sex manns eru í gæsluvarðhaldi vegna rannsóknarinnar og fimm hefur verið sleppt úr haldi. Málið er talið vera mjög umfangsmikið og margir eru sagðir tengjast því.
Jón Gunnar segir lögreglu þurfa að yfirfara mikið magn gagna í málinu. Aðspurður um hvers konar gögn sé að ræða, segir hann:
„Þetta eru myndbandsupptökur, farsímagögn, vitnaskýrslur, þetta eru bara gögn.“
Aðspurður segir hann að fleiri en einn bíll sé til rannsóknar í málinu. Hann vill ekki segja hvað bílarnir eru margir. „Það eru bílar til rannsóknar,“ segir hann og lætur þar við sitja, en sem vonlegt er getur lögregla veitt takmarkaðar upplýsingar um rannsókn málsins.
DV hefur heimildir fyrir því að húsleit hafi verið gerð hjá konu sem er í gæsluvarðhaldi vegna málsins. Aðspurður um fleiri húsleitir segir Jón Gunnar að það hafi verið gerðar húsleitir við rannsókn málsins en hann getur ekki gefið nánari upplýsingar um það.
Lögregla hefur gefið út að til rannsóknar sé meint manndráp, frelsissviptin og fjárkúgun. DV hefur heimildir fyrir því að árásin á manninn hafi verið tálbeituaðgerð sem snýst um ofbeldi gegn meintum barnaníðingum. Ekkert hefur hins vegar komið fram sem bendlar hinn látna við nokkuð slíkt.
Aðspurður segir Jón Gunnar ekki útilokað að fleiri verði handteknir og úrskurðaðir í gæsluvarðhald vegna málsins. „Það er eitthvað sem þarf bara að koma í ljós síðar. Við erum bara að vinna rannsóknina.“
