Samkvæmt heimildum DV fannst karlmaður látinn á leikvelli í Gufunesi í Grafarvogi í morgun og er málið rannsakað sem mögulegt manndrápsmál. Maðurinn er á sextugsaldri.

Miklir áverkar voru á manninum og samkvæmt heimildum DV eru árásarmennirnir grunaðir um að hafa beitt hann miklum barsmíðum og traðkað á honum. DV hefur hvað sem því líður ekki upplýsingar um dánarorsök.

Um handrukkun var að ræða og neitaði maðurinn að verða við kröfum árásarmanna um að millifæra mikið fé á tiltekinn aðila, svo nemur einhverjum milljónum króna.

Maðurinn er frá Suðurlandi, DV hefur ekki staðfestar upplýsingar um nákvæmlega hvar á Suðurlandi hann bjó, en það gefur ákveðnar vísbendingar að lögregluaðgerðir hafa staðið yfir vegna rannsóknar málsins í Þorlákshöfn í dag.

Lögreglan á Suðurlandi sendi frá sér tilkynningu um málið fyrr í dag og kom þar meðal annars fram að fimm eru í haldi lögreglu vegna rannsóknarinnar:

„Lögreglan á Suðurlandi hefur til rannsóknar andlát karlmanns sem lést snemma í morgun. Áverkar á hinum látna benda til að andlátið hafi borið að með saknæmum hætti.

Rannsókn málsins er á frumstigum og er málið rannsakað sem manndráp. Fimm aðilar eru í haldi lögreglu í tengslum við rannsóknina.

Lögreglan á Suðurlandi fer með rannsókn málsins og hefur notið aðstoðar lögreglunnar á höfuðborgarsvæðinu, Suðurnesjum og Vesturlandi auk embættis héraðssaksóknara og sérsveitar ríkislögreglustjóra.

Vegna rannsóknarhagsmuna er að svo stöddu ekki unnt að veita nánari upplýsingar um málið.“

Jón Gunnar Þórhallsson, yfirlögregluþjónn hjá Lögreglunni á Suðurlandi, sagði í samtali við DV fyrr í dag að frekari upplýsinga frá lögreglu um málið væri að vænta á morgun.

Ath. Samkvæmt fyrri frétt DV fannst líkið í Gufuneskirkjugarði. Hið rétta mun vera að maðurinn fannst á leikvelli í Gufunesi. Beðist er velvirðingar á þessari ónákæmni.