Rússneskur barnaskólakennari sagði upp störfum eftir að hafa óvart sýnt heilum bekk af 13 ára börnum klámmyndband. Kennarinn vissi ekki að myndbandið sæist á skjávarpanum fyrir aftan hann.
Kennarinn heitir Razif Nurgaliev og er 62 ára gamall. Hann kenndi eðlisfræði við barnaskóla í bænum Tashkinovo, nálægt borginni Neftekamsk sem er ekki langt frá landamærunum við Kasakstan.
Börnunum í bekknum, sem eru á fjórtánda ári, var heldur betur brugðið þegar gamli maðurinn settist niður og setti klámmyndband í gang. Augljóst var að hann áttaði sig ekki á því að skjávarpinn var tengdur og hann var að spila það fyrir allan bekkinn eins og segir í frétt Daily Mail um málið.
Laumaðist einn nemandinn til þess að taka myndband af þessu. Var myndbandinu svo hlaðið upp á samfélagsmiðla og fór fljótt af stað um netheima.
Skólinn var ekki á því að láta kennarann taka ábyrgðina á þessu og upphaflega var nemendunum kennt um. Var því haldið fram að nemendurnir hafi verið að gera kennaranum grikk.
Hins vegar viðurkenndi Razif að hafa opnað myndbandið sjálfur. En hélt því reyndar fram að það hafi verið fyrir mistök. „Ég klikkaði á eitthvað og einhver heimasíða opnaðist,“ sagði hann. Sagðist hann hafa ætlað að reyna að opna vísindatímarit en það fór ekki betur en þetta. Hann hafi alls ekki ætlað að opna klámsíðu, hvað þá að sýna nemendunum hana.
Að sögn skólastjórans, Rudinu Burkhanova, var kennarinn miður sín eftir að myndbandið fór á flakk um netheima. Foreldrar voru einnig mjög reiðir og hneykslaðir á kennaranum.
Fór svo að Razif sagði upp störfum út af málinu. Það var þó ekki vegna þrýstings frá skólanum en að sögn skólastjórans var hann mikils metinn starfsmaður og erfitt verður að finna staðgengil fyrir hann. Hafði Razif kennt eðlisfræði í um 40 ár við skólann.
Að sögn skólastjórans er nú rannsókn á málinu í gangi innan veggja skólans. Meðal annars á því hvernig efninu var dreift. Munu niðurstöðurnar verða kynntar síðar.
„Ég verð að heyra báðar hliðar,“ sagði Rudina. „Ég er nú þegar búin að tala við börnin og foreldrana og mun tala við kennarann. Aðeins eftir að ég hef rætt við alla aðila mun ég taka ákvörðun mína.“
En það eru ekki aðeins skólayfirvöld sem eru að skoða málið. Lögreglunni í héraðinu Bashkortostan var gert viðvart af málinu og gerði hún fartölvu Razif upptæka. Lögreglurannsókn stendur yfir.
