Bjarni Þór Sigurðsson er elsti frambjóðandinn í formannskosningum VR. Hann segir að aldursfordómar séu raunverulegt og viðvarandi vandamál á vinnumarkaði, sérstaklega hvað varðar fólk sem er komið yfir fimmtugt. Þetta hefur hann sjálfur upplifað í framboði sínu þar sem bent hefur verið á aldur hans.

Bjarni skrifar um þetta í aðsendri grein hjá Vísi þar sem hann rekur að fólk sem er komið yfir fimmtugt eigi erfiðara með að fá vinnu.

„Ef við lítum á íslenskan vinnumarkað, þá sjáum við dæmi þess að fólk með áratuga starfsreynslu fær ekki tækifæri einfaldlega vegna aldurs. Þetta er bæði óréttlátt og þjóðfélagslega óhagkvæmt, enda tap fyrir samfélagið í heild.“

Hann bendir sérstaklega á opinbera starfsmenn sem er gert að láta af störfum við sjötugt jafnvel þó að lífaldur hafi hækkað verulega síðan þessi aldursmörk voru sett. Margir á þessum aldri eru enn í blóma lífsins, við hestaheilsu og vilja vinna. Vinnumarkaður ætti að fylgja auknum lífslíkum með því að tryggja eldri einstaklingum sömu tækifæri og þeir yngri njóta.

„Aldursfordómar eru raunverulegt samfélagsvandamál sem útilokar verðmæta reynslu og þekkingu af vinnumarkaði, með skaðlegum afleiðingum fyrir samfélagið í heild.“

Bjarni bendir á að það eigi að horfa á hæfni, getu og framtíðarsýn við ráðningar frekar en fæðingarár. Fyrir utan það að aldri fylgir verðmæt reynsla sem getur skipt miklu máli.

„Mér hefur sjálfum verið legið á hálsi fyrir að vera of gamall, þar sem ég er elsti frambjóðandinn í formannskosningum til VR. Það er hins vegar staðreynd að reynsla getur skipt máli hvort sem við erum yngri eða eldri. Ég er stoltur af störfum mínum í verkalýðshreyfingunni undanfarin tuttugu ár og þá sérstaklega baráttu fyrir sanngjörnum húsnæðismarkaði. Ég bý meðal annars að þeirri reynslu að hafa gegnt stöðu varaformanns VR í fjögur ár, átt sæti í stjórn Lífeyrissjóðs verslunarmanna síðastliðin fimm ár.“

Bjarni bendir á að það séu stórar samfélagsbreytingar framundan með tækniframförum og gervigreind. Tryggja þurfi að þessar breytingar verði ekki notaðar til að ýta fólki út af vinnumarkaði. Sporna megi gegn þessu með því að efla tækifæri til sí- og endurmenntunar svo allir geti nýtt nýja tækni til að þróa hæfni sína, óháð aldri.

„Hvort sem við erum 25 eða 55 ára, þá eigum við öll að fá jöfn tækifæri til að læra, vaxa og leggja okkar af mörkum til samfélagsins.

Við þurfum að útrýma aldursfordómum, bæði í atvinnulífi, stjórnmálum sem og annars staðar í þjóðfélaginu þar sem þessi skaðlegu viðhorf grassera.“

Bjarni bendir á að hver vinnandi hönd er samfélaginu verðmæt og framtíðin byggist ekki á aldri.