Nánast daglega birtast fréttir af hrakandi heilsu hins 88 ára Frans páfa og er því ekki ólíklegt að tólf ára páfatíð hans sé senn á enda. Hvort sem hún endi með andláti eða afsögn hins hruma manns.
Þegar það gerist þarf að velja nýjan páfa, á sama hátt og gert hefur verið um aldir. Með ráðstefnu 138 kardínála í Sistínsku kapellunni og verður þeim ekki hleypt út fyrr en hvíti reykurinn sést rjúka upp úr skorsteininum og nýr páfi þar með kjörinn.
En hver verður hann? Enginn kardináli er beinlínis í framboði og engar skoðanakannanir gerðar á meðal kardínála. Í raun er mjög erfitt að segja til um hver gæti orðið næsti páfi en engu að síður eru ýmis nöfn talin líklegri en önnur. „Páfalegustu“ kardínálarnir, sem á ítölsku kallast „Papabili.“ DV leit yfir sviðið.
Efstur hjá veðbönkum er hinn 67 ára gamli Luis Antonio Tagle sem kemur frá Filippseyjum. Aldrei áður hefur páfi komið frá Austur-Asíu en í Filippseyjum býr þriðji mesti fjöldi kaþólikka í heiminum, á eftir Brasilíu og Mexíkó.
Tagle er sagður minna um margt á Frans páfa, meðal annars hvað varðar frjálsyndar skoðanir á ýmsum málum. Svo sem skilnaði, málefnum hinsegin fólks og innflytjendum. Tagle er einnig þekktur fyrir auðmýkt og að beita sér fyrir hjálp til fátækra.
Á hinum endanum, og meira í ætt við hinn íhaldssama Benedikt XVI, er hinn 72 ára gamli Peter Erdo. Erdo kemur frá Ungverjalandi, sem hefur á undanförnum árum undir stjórn Viktor Orban orðið eitt íhaldssamasta land í Evrópu og skoðanir Erdo endurspegla það.
Erdo er meðal annars á móti því að leyfa fráskildu fólki að ganga til altaris og hann hefur líkt móttöku flóttafólks við mansal. Erdo er fjórði í veðbönkum.
Málamiðlun á milli frjálslyndra og íhaldssamra afla í Vatíkaninu gæti verið að kjósa hinn sjötuga Pietro Parolin, sem er einmitt næst efstur í veðbönkum.
Parolin er í dag næstráðandi í Vatíkaninu og þykir hófsamur þegar kemur að flestum málum. Eiginlegur miðjumaður. Ítalir hafa átt langflesta páfa í gegnum tíðina og spurningin er hvort það sé ekki komið að þeim aftur eftir þrjá „útlenska“ páfa í röð.
Í þriðja sæti hjá veðbönkum er hinn 76 ára gamli Peter Turkson. Turkson hefur verið ráðgjafi Frans páfa í loftslagsmálum og málum sem varða félagslegt réttlæti. Hann hefur barist fyrir jöfnuði en er þó íhaldssamur á mörgum sviðum. Meðal annars gagnvart notkun getnaðarvarna.
Turkson er frá Gana á vesturströnd Afríku og gæti orðið fyrsti afríski páfinn síðan Gelasíus I sem var uppi á ofanverðri fimmtu öld. Aldrei hefur páfi komið frá Afríku sunnan Sahara.
Jafn vel íhaldssamari en Erdo er hinn 76 ára gamli Raymond Leo Burke frá Wisconsin fylki í Bandaríkjunum. Burke er í umræðunni en er þó ekki talinn á meðal þeirra líklegustu.
Burke er eindreginn stuðningsmaður Bandaríkjaforsetans Donald Trump og aðhyllist mjög íhaldssamar skoðanir. Meðal annars í málefnum hinsegin fólks, þungunarrofs og skilnaðar. Burke hefur verið sakaður um að tala gegn Frans páfa á undanförnum árum.
Sá langyngsti sem nefndur er sem mögulegur arftaki Frans er hinn 59 ára Ítali Pierbattista Pizzaballa. Pizzaballa er útsendari Vatíkansins í Landinu helga með aðsetur í Jerúsalem.
Pizzaballa hefur reynt að vera rödd til friðar í stríðinu á milli Ísraels og Palestínu. Eftir að ófriðurinn braust út á Gaza heimsótti hann svæðið og bauðst til að láta skipta á sér og gíslum í haldi Hamas samtakanna.
