Óhætt er að fullyrða að ákvörðun Einar Þorsteinssonar, borgarstjóra og oddvita Framsóknarflokksins hafi vakið furðu. Segja má að fall meirihlutans hafi komið sem þruma úr heiðskíru lofti fyrir marga en óveðurskýin voru þó sýnileg ef vel var að gáð. Að endingu var Flugvallarmálið, hið eilífa þrætuepli innan borgarstjórnar, sem var notað sem átylla til að slíta samstarfinu.
Fjölmargir hafa tjáð sig um tíðindin á samfélagsmiðlum. Þar á meðal fjölmiðlamaðurinn og samfélagsrýnirinn Egill Helgason sem telur eitthvað annað búa að baki.
„Þetta er nú meira leikritið. Gamalt dormandi deilumál vakið upp. Ekki beint eins og hafi verið komin nein ögurstund í flugvallarmálinu! Það býr nú eitthvað annað þarna að baki,“ skrifar Egill og bætir svo við að vandséð sé hvort hægt sé að mynda einhvern meirihluta en næst verður kosið vorið 2026.
„Ef Sjálfstæðisflokkur og Framsókn ætluðu að fara saman þurfa þeir að fá einhvern flokk til liðs við sig, þar koma varla til greina aðrir en VG, Sósíalistaflokkur eða FF. Hverjar eru líkurnar á því? Nema Viðreisn stökkvi yfir.“
Illugi Jökulsson, samfélagsrýnir og fjölmiðlamaður, er harðorðari.
„Almáttugur hvað þetta er ómerkilegt. Einar Þorsteinsson sem átti að vera maður nýrra og ferskra tíma reynist vera ömurlegur smeykur valdakall, hræddur við að missa vinnuna í næstu kosningum. Og valdi svo flugvallarmálið sem tilefni til að sprengja meirihlutann!! Flugvallarmálið! Þetta er nú meiri vitleysan.“
Áslaug Arna Sigurbjörnsdóttir, þingmaður Sjálfstæðisflokksins og formannsframbjóðandi, sá spaugilegu hliðina á þessu öllu saman.
Meirihlutinn í Reykjavík átti að fella trén, en það voru trén sem felldu meirihlutann.
— Áslaug Arna Sigurbjörnsdóttir (@aslaugarna) February 7, 2025
Þá hafa margir bent á það að meirihlutinn var ekki langlífur eftir að Dagur B. Eggertsson, borgarstjóri til margra ára, yfirgaf borgarstjórnina og hélt á Alþingi.
Borgin lifði ekki af 18 daga án Dags :/
— Nanna Hermannsdóttir (@nannahermanns) February 7, 2025
Í viðtali við RÚV fyrr í kvöld sagði Líf Magneudóttir, oddviti Vinstri Grænna, að stjórnarslitin hefði ekki komið sér á óvart enda hafi meirihlutinn verið verklaus og stemming súr. Þá sé óvíst hvort að Einar hafi pálmann í höndunum varðandi meirihlutasamstarf og meðal annars séu uppi hugmyndir um kvennastjórn enda sitji 15 konur í borgarstjórn.
Þá segir Líf Einar ekki hafa haft samband við oddvita í borginni áður en ákvörðunin var tekin, og að því leyti hafi ákvörðunin komið á óvart. „Hann er ekki með neitt plan en hann hefur aldrei haft neitt plan sem borgarstjóri heldur.“
Hjálmar Sveinsson, borgarfulltrúi Samfylkingarinnar var á öðru máli í viðtali við Vísi.
„Ég bara viðurkenni fúslega að þetta kemur mér mjög á óvart, og mér finnst óskiljanlegt að mál sem að allir hafa vitað allan tímann að væru skiptar skoðanir um, flugvallarmálið, að það skuli vera notað sem átylla til að sprengja meirihlutann,“ sagði Hjálmar og bætti við að flugvöllurinn hefði verið eina ágreiningsmál meirihlutans.
Þá eru margir á því að um 3% fylgi Framsóknarflokksins í borginni samkvæmt skoðanakönnunum, sem margir uppnefna pilsnerfylgi, sé ástæðan fyrir ákvörðun Einars.
Það kemur ekki á óvart að flokkur sem er bara með um 3% fylgi í könnunum í borginni (og þurrkaðist nær út á þingi) geti ekki staðið með framtíðarsýn heldur berist eins og lauf í vindi í leit að stuðningi hverra þeirra sem hæst hafa og engu vilja breyta.
— Erlendur (@erlendur) February 7, 2025
