Jón Gnarr, þingmaður Viðreisnar, var klagaður til landskjörstjórnar í kjölfar þess að hann var kjörinn á þing, sem 7. þingmaður Reykja­vík­ur­kjör­dæm­is suður, í nýliðnum kosningum. Í greinargerð landkjörstjórnar vegna kosninganna kemur fram að kjörstjórninni barst ábending frá nafngreindum einstaklingi, Þór Gunnlaugssyni,  þess efnis að viðkomandi hafði áhyggjur af því að Jón væri ekki með óflekkað mannorð þar sem hann hefði fengið skilorðsbundinn dóm í Héraðsdómi Reykjavíkur árið 1999. Gæti það haft áhrif á kjörgengi hans til Alþingis. Morgunblaðið greinir frá.

Jón var á sínum tíma dæmdur fyrir hlut sinn í gríninnslagi í útvarpsþættinum Tvíhöfða en hann og Sigurjón Kjartansson sendu starfsmann útvarpstöðvarinnar X-ins, 7. Jón Atla Jónsson, niður á Alþingi í þeim tilgangi að trufla þingfund og láta handtaka sig, sem var um tíma fastur liðu í þættinum.

„Góðan daginn, þið hafið svikið fólkið með gagnagrunnsfrumvarpinu. Fólkið í landinu mun ekki líða þetta,“ hrópaði Jón Atli yfir þingsalinn eftir að þingfundur var hafinn. Jón Atli var umsvifalaust handtekinn í kjölfarið.

Þrátt fyrir iðrun Tvíhöfðamanna og afsökunarbeiðni ákvað skrifstofustjóri Alþingis að taka málið alla leið. Meðal annnars var blómvöndur sem grínistarnir sendu til skrifstofu Alþingis endursendur. Þremenningarnir voru ákærðir í kjölfarið og fengu áðurnefndan skilorðsbundinn dóm vegna málsins.

Málið kom síðan inn á borð undirbúningsnefndar fyrir rannsókn kosninga til Alþingis sem Dag­ur B. Eggerts­son alþing­ismaður veit­ir for­stöðu og kynnt var á Alþingi á þriðju­dag. Þar var fjallað um áðurnefnda greinargerð landskjörstjórnar. Var það niðurstaða nefndarinnar að í  ljósi þess að Jón hlaut skil­orðsbund­inn dóm sam­kvæmt fram­an­sögðu sé ekki til­efni til þess að bregðast frek­ar við ábend­ingu um kjörgengi hans.

Jón Gnarr fær því að halda þingsæti sínu.