Peningastefnunefnd bankans hefur ákveðið að lækka vexti bankans um 0,5 prósentur. Verða því meginvextir bankans á sjö daga bundnum innlánum, svonefndir stýrivextir, því 8,0%. Stýrivextir hafa lækkað nokkuð að undanförnu og voru þeir til dæmis 9,25 prósent í október síðastliðnum þegar lækkunarferli hófst.
Sjá einnig: Stýrivextir lækka um 0,5 prósentur
Vilhjálmur fagnar ákvörðun peningastefnunefndar Seðlabankans og segir hann að um sé að ræða ánægjuleg tíðindi. Þetta sé í anda þess sem lagt var upp með þegar gengið var frá kjarasamningi í mars á síðasta ári.
„Enda lá fyrir að meginmarkmið okkar í síðustu kjarasamningum var að skapa skilyrði fyrir lækkun verðbólgu og vaxta og nú er ljóst að sá árangur er byrjaður að skila sér af fullum þunga. Verðbólga hefur lækkað úr tæpum 7% niður í 4,6% og stýrivextir hafa lækkað um 1,25 prósentustig frá undirritun,“ segir Vilhjálmur í pistli á Facebook-síðu sinni.
Hann bendir einnig á hvað þessi vaxtalækkun þýðir fyrir fjölskyldu með dæmigert húsnæðislán.
„Þessi nýjasta lækkun mun til dæmis þýða það ef hún skilar sér að fullu í lækkun á óverðtryggðum vöxtum til heimilanna að 50 milljóna króna húsnæðislán mun verða með 250.000 kr. lægri vaxtabyrði á ári eða sem nemur tæpu 21.000 á mánuði en til að hafa 21.000 kr. í ráðstöfunartekjur þarftu að hafa yfir 32.000 kr. í laun.“
Vilhjálmur segir að við séum á réttir leið.
„Klárlega, enda var meginmarkmiðið að auka ráðstöfunartekjur okkar félagsmanna með þremur þáttum, það er að segja launahækkunum, lækkun vaxta og verðbólgu og lagfæringu á tilfærslukerfunum. Allt er þetta að raungerast, þökk sé framsýni verkalýðshreyfingarinnar. En betur má ef duga skal og nú er mikilvægt að allir axli ábyrgð í að viðhalda áframhaldandi lækkun verðbólgu og vaxta.“
