Landsmenn þurfa að búa sig undir óveður í dag og fram á morgundaginn því appelsínugular viðvaranir taka gildi á öllu landinu í dag. Óveðrið skellur á vestanverðu landinu klukkan 14 en um klukkan 16 á norðaustan- og austanverðu landinu.

Íbúar á höfuðborgarsvæðinu – eins og annars staðar – þurfa að gera ráð fyrir hugsanlegu foktjóni. Á vef Veðurstofu Íslands segir meðal annars um stöðuna á höfuðborgarsvæðinu:

„Sunnan 20-28 m/s, hvassast vestantil, en heldur hægari um tíma í kvöldið. Rigning, talsverð um tíma. Foktjón líklegt.“ Appelsínugul viðvörun á höfuðborgarsvæðinu gildir frá klukkan 14 í dag og fram til miðnættis.

Á Suðurlandi má gera ráð fyrir að vindur verði 23 til 30 metrar á sekúndu og hviður fari yfir 35 metra á sekúndu. Foktjón og raskanir á samgöngum eru líklegar og ekkert ferðaveður. Þá er varað við hugsanlegum vatnavöxtum.

Staðan í öðrum landshlutum verður svipuð og á Norðurlandi eystra gætu vindhviður fari yfir 40 metra á sekúndu. Viðvörunin þar gildir til klukkan þrjú i nótt. Sömu sögu er að segja af Austurlandi þar sem foktjón er líklegt og ekkert ferðaveður.

Í Morgunblaðinu í dag er rætt við Kristínu Öglu Tómasdóttur, veðurfræðing á Veðurstofu Íslands, og á hún von á erfiðum skilyrðum víða. „Þetta er ekki góð spá og líklega versta veður ársins. Sérstaklega þegar horft er til þess að þetta nær til alls landsins,“ segir hún.

Hægt er að kynna sér veðurviðvaranir hér og veðurspána hér.