Trump hefur sagt ýmislegt eftir að hann tók við embætti Bandaríkjaforseta, en eins og kunnugt er eru Ísraelsmenn og Bandaríkjamenn nánir bandamenn.
Trump lagði til að íbúar Gasa myndu finna sér samastað í nágrannalöndum og að því loknu myndu Bandaríkjamenn taka yfir svæðið. Hann útskýrði þó ekki hvernig hann ætlaði sér að fara að þessu og hvað réttlæti það að Bandaríkjamenn tækju svæðið yfir.
„Við munu eiga það og bera ábyrgð á því að eyða til dæmis hættulegum sprengjum sem enn eru á svæðinu,“ sagði hann og bætti við að Bandaríkjamenn myndu jafna ónýtar byggingar á svæðinu við jörðu. Svæðinu yrði mögulega breytt í einhvers konar ferðamannaparadís.
Trump segir að Gasa sé „táknmynd dauða og eyðileggingar“ og eina ástæða þess að Palestínumenn vilji snúa þangað aftur sé sú að þeir hafi engan annan stað til að leita á. Útilokaði hann ekki að senda bandarískar hersveitir á Gasa.
Eins og gefur að skilja hafa ummæli Trumps fallið í grýttan jarðveg víða.
Yfirvöld í Sádi-Arabíu hafa til dæmis fordæmt ummæli hans og sagt að eðlilegum samskiptum við Ísrael verði ekki komið á nema með sjálfstæðu og fullvalda ríki Palestínu. Kínversk yfirvöld hafa einnig mótmælt þessum hugmyndum, ekki komi til greina af þeirra hálfu að flytja íbúa Gasa á brott.
Þá hafa bæði bandarískir Demókratar og Repúblikanar gagnrýnt ummælin, að því er fram kemur í frétt Guardian. Justin Amash, fyrrverandi þingmaður Repúblikana, varar við því að Bandaríkin grípi til svo viðamikilla aðgerða.
Faðir Amash var hrakinn af heimili sínu af ísraelskum hersveitum árið 1948. Segir hann að slíkar aðgerðir jafngildi þjóðernishreinsunum. „Enginn Bandaríkjamaður með góða samvisku getur stutt þessa hugmynd,“ segir hann.
„Forsetinn er opinberlega að kalla eftir þjóðernishreinsunum þar sem hann situr við hliðina á stríðsglæpamanni,“ sagði Rashida Tlaib, þingkona Demókrata, á X.
