„Í kringum síðustu aldamót munaði hársbreidd að ég leikstýrði bíómyndinni DRAUMUR Í DÓS. Ég hafði skrifað handritið og fengið til þess tvívegis handritsstyrk og síðan fullan framleiðslustyrk úr Kvikmyndasjóði. Það var framleiðslufyrirtækið Saga Film sem ætlaði að vinna þetta verkefni með mér. Síðan gerðist það af asnalegum ástæðum, sem ég ætla ekki að rekja hér og nú, að myndin varð aldrei að veruleika og ég skilaði styrknum í heild sinni til sjóðsins,“ sagði Karl Ágúst í færslu sinni og bætti við:
„Nú vill einnig svo asnalega til að umrætt handrit finnst ekki, hvernig sem leitað er, hvorki útprentað, inni á gömlum tölvudiskum eða í tölvupóstum til þeirra sem áttu og ætluðu að vinna að myndinni með mér. Að vísu hafa fleiri verk eftir mig glatast af ýmsum ástæðum (aðallega asnalegum), en þetta er ákaflega sérkennilegur skaði sem ég á erfitt með að sætta mig við,“ sagði Karl og spurði þar af leiðandi hvort það sé hugsanlegt að einhver lumi á DRAUMI Í DÓS í einhverju formi.
Kvaðst hann hafa spurt Kvikmyndamiðstöð, Kvikmyndasafnið, Saga Film og alla þá sem unnu að undirbúningi myndarinnar, en enn sem komið er hafi handritið ekki fundist.
