Landsréttur kvað í dag upp dóm í snúnu og óvenjulegu máli. Var þar tekin fyrir áfrýjun bæjarfélags á dómi Héraðsdóms Reykjaness þar sem presti og forstöðumanni ótiltekinnar stofnunar á Suðurnesjum höfðu verið dæmdar háar bætur vegna framgöngu barnaverndarnefndar.

Árið 2017 leitaði kona til starfsmanns barnaverndar vegna ásakana systur hennar um að áðurnefndur prestur hefði brotið gegn henni fyrir mörgum árum. Bað hún barnaverndarnefnd um að hafa milligöngu um kæru til lögreglu. Við þessari beiðni var orðið.

Í kjölfar kærunnar var presturinn handtekinn fyrir framan börn sín og eiginkonu á heimili þeirra og tekinn til yfirheyrslu. Málið var síðan fellt niður eftir rannsókn og var sú ákvörðun héraðssaksóknara ekki kærð til ríkissaksóknara. Málinu var því lokið en eftir stóð presturinn, að eigin sögn með stórlaskað mannorð, auk þess sem hann og fjölskylda hans hefðu orðið fyrir áfalli sem þau myndu aldrei ná sér af.

Hann kærði vinnubrögð barnaverndar til Gæða- og eftirlitsnefndar velferðarmála. Niðurstaða nefndarinnar var sú að vinnubrögð barnaverndarnefndar í málinu hefðu verið ámælisverð og á skjön við lög. Ekki sé eðlilegt að barnavernd sé erindreki fólks í kærum til lögreglu og einnig eigi nefndin ekki að fjalla um málefni fullorðins fólks, en konan sem kærði var 25 ára gömul.

Í kjölfarið fór presturinn fram á afsökunarbeiðni og miskabætur af hálfu bæjarfélagsins auk þess sem hann krafðist þess að fá afhent öll gögn í málinu. Þessu var hafnað.

Stefndi hann þá bæjarfélaginu fyrir Héraðsdóm Reykjaness sem dæmdi honum í vil og dæmdi bæjarfélagið til að greiða honum þrjár milljónir króna í miskabætur, rúmlega eina og hálfa milljón í skaðabætur og málskostnað vel yfir þrjár milljónir.

Því miður fyrir prestinn sneri Landsréttur þessum dómi við í dag og sýknaði bæjarfélagið. Taldi Landsréttur bæjarfélagið ekki hafa brotið lög með því að hafa milligöngu um sendingu lögreglukæru og benti á að ekki hefði verið stofnað til sérstaks barnaverndarmál vegna þessara athafna.

Dóma Landsréttar og héraðsdóms í málinu má lesa hér.

Óljóst er á þessari stundu hvort reynt verður að áfrýja málinu til Hæstaréttar.