Kona á fertugsaldri missti nefið eftir að hafa notað kókaín daglega í nokkur ár. Hún þurfti að fara í aðgerð til að láta endurbyggja nefið.
Tímaritið People greinir frá þessu.
Kelly Kozyra, 38 gömul bandarísk kona frá borginni Chicago, sagði sögu sína sem endaði með þessum alvarlegu afleiðingum. Hún byrjaði að nota kókaín árið 2017 og varð fljótlega háð því.
„Mér fannst ég ekki vera að nota það mikið, en þetta var mjög mikið,“ sagði Kelly. Á tveimur árum eyddi hún 80 þúsund dollurum í kókaín. Það gera rúmar 11 milljónir íslenskra króna. En fjárhagslegi skaðinn var hjómið eitt miðað við þann toll sem efnið tók af líkama hennar.
„Eftir þrjá mánuði af daglegri neyslu fór ég að finna fyrir blæðingum í nefinu og var farin að snýta bitum af húð. Ég tók eftir því að brjóskið á milli nasanna var byrjað að rýrna en ég hugsaði með mér að þetta hlyti að lagast af sjálfu sér þannig að ég hélt áfram að sjúga upp í nefið,“ sagði Kelly.
Að lokum hvarf allt brjóskið á milli nasanna á henni. Ekki nóg með það þá byrjaði brjóskið í nefinu sjálfu að rýrna og rofna. Einn daginn var komið gat á utanvert nefið og gatið stækkaði og stækkaði uns það var á stærð við krónupening.
Hætti Kelly þá að nota kókaín? Nei, aldeilis ekki. Hún aðlagaði neysluna að hinu síhrörnandi nefi sínu.
„Það kom að því að ég þurfti að troða litla fingri upp í nefið til þess að halda kókaíninu kjurru svo það myndi ekki leka út um holuna,“ sagði Kelly.
Kókaín getur valdið sýkingum og bólgum í nefi. Í verstu tilfellunum, eins og hjá Kelly, myndast drep.
View this post on Instagram
„Ég sagði fólki að ég væri með sýkingu í ennis og kinnholum og laug mig út úr öllu,“ sagði Kelly. „Mér hryllti við útliti mínu.“
Kelly sigraðist loks á kókaínfíkn sinni árið 2021 og hefur verið á beinu brautinni síðan. Þá hafði hún aðeins notað kókaín í um fjögur ár en nefið var beinlínis horfið. Þurfti hún að fara í 15 aðgerðir til þess að byggja upp nefið á ný.
„Mér finnst það hjálpa mér og öðrum að vera opin með þetta,“ sagði Kelly sem ætlar að verða meðferðarráðgjafi. „Kókaín eyðilagði allt í lífi mínu, þar á meðal nefið mitt.“
