Árið 2023 gagnrýndi þáverandi aðstoðarskólastjóri Réttarholtsskóla, Jón Pétur Zimsen, það að formaður Sambands íslenskra sveitarfélaga, Heiða Björg Hilmisdóttir, hefði blokkað hann á Facebook því hún vildi ekki horfast í augu við skelfilegar niðurstöður íslenskra grunnskólabarna í PISA-könnunum. Hann hafi krafið hana svara, hún ekki viljað veita svör og á endanum blokkað hann með vísan til áreitis.
Jón Pétur, sem nú situr á þingi fyrir Sjálfstæðisflokkinn, minnti á þetta mál í samtali við hlaðvarpið Ein Pæling í vikunni. Sólrún Ösp Jóhannsdóttir kennari segir að þarna sé Jón Pétur að kasta steinum úr glerhúsi. Hún var nemandi hans þegar hann kenndi við Réttarholtsskóla en leyfði sér í aðdraganda alþingiskosninganna í nóvember að rökræða við hann á Facebook. Fyrir vikið blokkaði Jón Pétur hana.
Sólrún greinir frá þessu í færslu á Facebook. Sólrún hlustaði á Morgunútvarp Rásar 2 í gær en þangað var mættur stjórnandi hlaðvarpsins Ein pæling, Þórarinn Hjartarson. Hann sagðist ekki mikill aðdáandi Heiðu Bjargar og vísar til þess að hann og Jón hafi rætt í hlaðvarpinu „að þegar að Jón Pétur Zimsen reyndi að vekja athygli á mjög bágri stöðu er varðaði PISA-kannanir og svona getu og heilsu ungra barna til þess að takast á við ranir lífsins eftir grunnskólanám, þá blokkaði hún hann á Facebook sem var alveg ótrúleg vegferð þegar hann var s.s. skólastjóri og hún var s.s. yfir þessum málum“
Sólrún Ösp segir þetta nú ekki ótrúlegri vegferð en það að Jón hafi gert það sama fyrir ekki löngu síðan.
„Í ljósi þessa langar mig að koma því á framfæri að Jón Pétur Zimsen hefur spilað svipaðan leik við mig, heldur undarlegri þó þar sem hann ákvað að blokka mig (fyrrverandi nemanda sinn úr Réttarholtsskóla) nýlega og eyða samskiptum okkar á milli. Kannski vegna þess að ég er ósammála honum í skólamálum? Ég veit það ekki.
Mér finnst allavega kómískt að hann skuli vera að kvarta opinberlega yfir því að hafa verið blokkaður þegar hann hefur gert það sama!“
Sólrún segir í samtali við blaðamann að hún hafi ekkert verið að rífast við Jón Pétur. Hann var á þessum tíma í kosningabaráttu og hún skrifaði athugasemd við færslu hjá honum á Facebook sem honum hefur mögulega þótt koma illa út fyrir sig. Hann sendi henni því einkaskilaboð. Sólrúnu fannst hann reyna að þagga þar niður í henni þar sem hún var einu sinni nemandi hans. Hann sendi henni nokkur skilaboð en Sólrún svaraði bara einu sinni. Skyndilega veitti Sólrún því svo eftirtekt að hún var blokkuð. Hún veltir fyrir sér hvort það hafi verið til að koma í veg fyrir fleiri athugasemdir frá henni í aðdraganda kosninga. Mögulega hafi hann svo eytt skilaboðum því þar mátti sjá að það var hann sem lét hana ekki í friði þegar hann fékk ekki svör.
