Í tilkynningu frá Happdrætti Háskóla Íslands kemur fram að í hverjum mánuði séu vinningshafar um 3.000 talsins og er heildarupphæð vinninga að meðaltali vel yfir 100 milljónir króna.
En til að hægt sé að greiða út vinninga þurfa bankaupplýsingar miðaeiganda að vera réttar, en því miður er það ekki alltaf svo.
„Á hverju ári safnast saman vinningar sem ekki næst að greiða út, sérstaklega þegar einnig vantar aðrar grunnupplýsingar, svo sem netfang eða símanúmer. Í dag eru 250 vinningshafar sem eiga samtals 5.000.000 kr. inni hjá Happdrættinu. Happdrættið leitar að Jóhanni, Köru, Kristófer, Fjólu, Rannveigu, Halldóru, Guðrúnu, Kolfinnu, Maríu, Trausta, Höllu, Lilju, Ólafi, Hörpu, Önnu, Gerði, Ingu og Láru og hinum 233 vinningshöfunum.”
Í tilkynningunni kemur fram að besta leiðin fyrir miðaeigendur til að kanna hvort þeir tilheyri þessum hópi sé að skrá sig inn á smáforritið Happið eða mínar síður á www.hhi.is, fara yfir upplýsingarnar og skoða hvort vinningur hafi komið á miðann þeirra.
Þar er líka hægt að uppfæra upplýsingar og skoða miðana sem viðkomandi á auk vinningasögu.
„Happdrætti Háskólans gerir sitt besta til að hafa upp á öllum þeim sem hljóta vinninga enda er stuðningur miðaeiganda við uppbyggingu Háskóla Íslands ómetanlegur,“ segir að lokum.
