Eldri hjón lentu í tugþúsunda króna kostnaði hjá erlendri bílaleigu vegna þess að bráðabirgða alþjóðlegt ökuskírteini var ekki tekið gilt. Eru þau reið Sýslumanninum á höfuðborgarsvæðinu fyrir villandi upplýsingar.
María Jónsdóttir þurfti að endurnýja ökuskírteinið sitt hjá Sýslumanninum í janúar vegna aldurs. Þar sem bið var til að fá nýju skírteinin fékk hún bráðabirgða alþjóðlegt ökuskírteini sem henni var sagt að myndi gilda.
Hún og maðurinn hennar, Þorsteinn Gíslason, voru á leið til Portúgal og höfðu pantað bílaleigubíl á hennar nafni og greitt fyrir það. En þegar þau mættu út til Lissabon til þess að sækja bílinn tók bílaleigan ökuskírteinið ekki gilt. Samningnum var rift og María fékk ekki endurgreitt. Þurftu hjónin að panta nýjan bíl á mun hærra verði vegna aldurs hans.
Aðspurð um hvað þetta allt saman hafi kostað þau hjónin segir María 387 evrur. En það gera um 57 þúsund íslenskar krónur.
María segist vera mjög reið Sýslumanninum á höfuðborgarsvæðinu fyrir villandi upplýsingagjöf.
„Að biðja mig um að koma með mynd af mér fyrir alþjóðlegt ökuskírteini og gefa mér þær upplýsingar að það muni gilda í Portúgal er fáránlegt,“ segir hún. Segist hún ekki vita hvenær hún fær nýtt ökuskírteini. Sú bið getur hlaupið á mánuðum.
En það er ekki aðeins kostnaður sem fylgir þessu heldur líka óþægindi. Því María getur ekki keyrt.
„Ég má ekki keyra hér. Þeir vilja ekki sjá rafræn skírteini. Það er 3.500 evru sekt ef ég er ekki með plast skírteini,“ segir María. En það jafngildir um 515 þúsund íslenskum krónum.
María segist ekki enn þá hafa haft samband við Sýslumanninn vegna þessa máls. Það hafi ekki gefist tími til þess enn þá en hún hafi hugleitt að finna sér lögmann til að reyna að fá endurgreiðslu fyrir kostnaðinum sem af þessu öllu hefur hlotist.
