Oddur Árnason mun senn láta af störfum hjá lögreglunni á Suðurlandi eftir tæp 40 ár sem lögreglumaður. Oddur er í einlægu viðtali í Morgunblaðinu í dag þar sem hann rifjar meðal annars upp kvöld eitt árið 2023 þegar hann brotnaði fyrirvaralaust niður.

„Ég sat í sóf­an­um heima að kvöldi þegar yfir mig hellt­ist sú til­finn­ing að ég hrein­lega bugaðist. Tár­in runnu fram og ég mátti mín lít­ils. Þannig sat ég fram á nótt­ina og gerði mér þá strax grein fyr­ir að ég væri kom­inn á stað í líf­inu þar sem ég ætti ekki að reyna einn að vaxa út úr vand­an­um, held­ur leita mér aðstoðar.“

Strax daginn eftir upplýsti hann yfirmann sinn, Grím Hergeirsson lögreglustjóra, um stöðu mála og var þá kominn í veikindaleyfi.

„Strax í kjöl­farið sendi ég tölvu­póst til sam­starfs­fólks míns um hvað væri að. Taldi slíkt vera mjög mik­il­vægt svo eng­in leynd­ar­mál væru í gangi,“ segir Oddur meðal annars í viðtalinu.

Það getur tekið mikið á að vera í lögreglunni, ekki síst sem yfirmaður en Oddur er fráfarandi yfirlögregluþjónn á Selfossi. Þar áður starfaði hann í 18 ár á Vestfjörðum. Hann hefur gengið í gegnum ýmislegt sem lögreglumaður á þessum tíma og má þar nefna snjóflóð, banaslys í umferðinni, andlát, sjálfsvíg og alvarleg veikindi.

Í viðtalinu segir Oddur að allt sé þetta mál sem hafi reynt á hann en ef til vill meira en hann taldi sjálfur.

„Mér fannst ég kunna þetta allt og geta. En svo hrundi eitt­hvað, án þess að neitt eitt hafi valdið því,“ seg­ir Odd­ur meðal annars í viðtalinu sem má lesa í heild sinni í Morgunblaðinu í dag.