Eins og greint hefur verið frá eru umdeildar framkvæmdir fyrirhugaðar á vinsælu brimbrettasvæði við Þorlákshöfn. Um er að ræða landfyllingu í höfninni í Þorlákshöfn og hefur brimbrettafólk gagnrýnt að hún komi til með að eyðileggja eina glæsilegustu brimbrettaöldu landsins.
Hefur brimbrettafólk gripið til ýmissa aðgerða, til dæmis mótmæla og setuverkfalls eins og fjallað var um á vef Vísis í vikunni.
Elliði bendir á í færslu sinni að hann hafi verið viðloðandi stjórnmál í áratugi og eins og gefur að skilja komi oft upp umdeild mál, allt frá erfiðum kjaradeilum yfir í skipulagsmál.
„Aldrei hef ég upplifað þá heift og þá hörmung sem einkennir því miður hluta af brimbrettafólki sem nú notar öll brögð til að koma í veg fyrir lögformlega ákvörðun fullvalda sveitarfélags. Þetta fólk sem harðast gengur fram -sérstaklega þeir sem einnig gegna trúnaðarstörfum fyrir brimbrettafólk- koma óorði á hina,“ segir Elliði og birtir meðfylgjandi skjáskot af skilaboðum sem hann fékk í gær:
„Þessi skilaboð sem ég fékk í gær (og eru hér á mynd) eru því miður eitt margra dæma. Annað má til telja svo sem fullyrðingar um mútuþægni, veist hefur verið að börnum mínum á skemmtistað, glasi hent í átt að mér í miðbænum og óendanlegur fjöldi skilaboða sem þessara. Þá hefur verið ráðist að fyrirtækjum heimamanna, kjörnir fulltrúar atyrtir og fl. Listinn er endalaus. Svona mega mál ekki ganga fyrir sig,“ segir Elliði að lokum.
