En ef hann vill koma höndum yfir hið verðmæta liþíum, þá verður hann að hafa hraðar hendur því Rússar standa við dyrnar og banka.
„Já, ég vil tryggja öryggi þessara sjaldgæfu jarðmálma. Við sendum þeim mörg hundruð milljónir dollara. Þeir eiga mikið af sjaldgæfum málmum og ég vil fá tryggingu fyrir því að við fáum þá,“ sagði Trump í síðustu viku.
Með þessum ummælum tvinnaði hann kaupmennsku saman við afstöðuna til stríðsins í Úkraínu og opnaði um leið fyrir möguleikann á áframhaldandi stuðningi við landið en það er mjög háð vopnum frá Bandaríkjunum. Hergagnaframleiðslan í Evrópu er ekki nægilega öflug og getur ekki tryggt Úkraínu jafn mikið af vopnum og koma frá Bandaríkjunum.
En hugmyndin er raunar ekki frá Trump kominn því hún var sett fram í siguráætlun Úkraínumanna sem Volodymyr Zelenskyy, forseti, kynnti á síðasta ári. Í henni er opnað á möguleikann á að í staðinn fyrir stuðning Vesturlanda leyfi Úkraínumenn vestrænum fyrirtækjum að vinna málma úr jörðu í Úkraínu.
Bandaríkin og Úkraína gerðu samning varðandi þetta á meðan Joe Biden var við völd en samningurinn rann út í sandinn. New York Times segir að það hafi verið vegna þess að Úkraínumenn hafi viljað geyma hann svo þeir gætu boðið Trump þetta þegar hann tæki við völdum.
Auk liþíums, þá eru til dæmis úran og títaníum í jörðu í Úkraínu auk kola.
En Trump verður að hafa hraðar hendur ef hann vill tryggja sér aðgang að liþíum í Úkraínu því mesta magnið af þessum málmi í Úkraínu og Evrópu er í þeim hluta Dnipro-héraðs sem liggur að Donetsk-héraðinu en þar eru Rússar nú að reyna að umkringja bæinn Pokrovsk. Þeir eru í aðeins 10 km fjarlægð frá svæðinu þar sem liþíumið er og því verður Trump að hafa hraðar hendur með að senda Úkraínumönnum hernaðaraðstoð ef hann vill koma í veg fyrir að efnið falli í hendur Rússa.
