Af mörgum stórum nöfnum í áhorfendaskaranum voru Trump og Swift líklega þau stærstu en segja má að þau hafi fengið misjafnar viðtökur frá áhorfendum.
Þegar myndavélarnar beindust að Trump mátti heyra mikil fagnaðarlæti úr stúkunni, en þegar vélarnar beindust að Swift voru viðbrögðin önnur og mátti sjá að Swift var hálf undrandi á viðtökunum.
Trump notaði samfélagsmiðil sinn, Truth Social, til að skjóta á Swift fyrir þetta og birti hann til að mynda tvö myndbönd sem sýndu viðtökurnar sem hann fékk annars vegar og hún hins vegar. Þá skaut hann á hana í færslu þar sem hann skrifaði:
„Sú eina sem átti verra kvöld en Kansas City Chiefs var Taylor Swift. Hún var PÚUÐ út af vellinum. MAGA er miskunnarlaust,“ sagði hann og vísaði í einkennisorð sín MAGA, eða Make America Great Again.
Swift er sem kunnugt er unnusta Travis Kelce sem er ein stærsta stjarnan í liði Kansas City Chiefs. Kansas-liðið sá aldrei til sólar í leiknum í nótt og fór Philadelphia Eagles með sigur af hólmi, 40-22,
Philadelphia komst í 24-0 og stefndi lengi vel í einn stærsta ósigur liðs í sögu Super Bowl en Kansas tókst að laga stöðuna örlítið í lokin.
